Nau Mprơ Ơm 97 - Nau Brah Ndu Ngơi 2023

Nau Brah Yêhôva dơi chiă uănh toyh

¹ Nau Brah Yêhôva chiă uănh! Ơ neh ntu, hâk maak hom! Ơ lĕ rngôch gôl dak mƀŭt, maak răm hom!

² Ndâr tŭk jêh ri nau ngo mbâl nchueng jŭm Păng, Nau sŏng srăng jêh ri nau di ƀư mbon ma sưng hađăch Păng.

³ Ŭnh mpăr tanăp Păng Jêh ri su lĕ rngôch phung rlăng văr jŭm Păng.

⁴ Lơp nglaih Păng sol ang neh ntu; Neh ntu saơ jêh ri mpât n'gơ.

⁵ Phung yôk lêk hoch nâm bu mpêt tanăp Brah Yêhôva, Tanăp Kôranh Brah ma lĕ rngôch neh ntu.

⁶ Lĕ ndâr trôk mbơh nau sŏng srăng Păng, Lĕ rngôch phung ƀon lan uănh nau chrêk rmah Păng.

⁷ Ăn lĕ rngôch ma phung mbah rup brah, Jêh ri phung ngơi blă blơ ma rup brah geh nau bêk prêng da dê. Ơ lĕ brah, yơk mbah hom ma Brah Yêhôva!

⁸ Ơ Brah Yêhôva, Siôn tăng jêh ri hâk maak, Phung kon bu ur Yuđa geh nuih n'hâm hâk răm da dê, Yor nau May phat dôih.

⁹ Yorlah ơ Brah Yêhôva! May jêng Nơm Dŭt Prêh ma lĕ rngôch neh ntu, May geh nau yơk rlau lơn ma lĕ rngôch brah.

¹⁰ Ơ phung rŏng ma Brah Yêhôva, tâm rmot hom ma nau mhĭk. Păng king n'gang huêng phung kloh ueh Păng Jêh ri tâm rklaih khân păng bơh ti phung mhĭk.

¹¹ Nau ang sol phung sŏng srăng Jêh ri nau maak bêng ler tâm nuih n'hâm phung sŏng.

¹² Ơ phung sŏng srăng, maak hom tâm Brah Yêhôva! Jêh ri tâm rnê lah ueh tâm amoh kloh ueh Păng.