Nau Mprơ Ơm 96 - Nau Brah Ndu Ngơi 2023

Nkah nti phung ƀon lan yơk mbah ma Brah Yêhôva jêng Nơm phat dôih sŏng srăng

¹ Mprơ hom ma Brah Yêhôva du nau mprơ mhe. Hơi lĕ rngôch neh ntu, mprơ hom ma Brah Yêhôva.

² Mprơ tâm rnê hom ma Brah Yêhôva jêh ri mât ton tâm amoh Păng; Mbơh ăp nar nau Păng tâm rklaih.

³ Nkoch bri nau chrêk rmah Păng ta nklang lĕ bri dak, Mbơh lĕ nau kan khlay Păng ma phung ƀon lan.

⁴ Yorlah Brah Yêhôva dŭt toyh, khư ngăn ma bu mprơ tâm rnê, Păng khư ngăn ma bu klach yơk rlau lơn ma lĕ rngôch brah.

⁵ Yorlah lĕ rngôch brah phung ăp mpôl bunuyh jêng rup brah, Bi Brah Yêhôva rhăk jêh lĕ ndâr trôk.

⁶ Nau rnam jêh ri nchrat ang gŭ tanăp Păng; Nau Brah jêh ri nau ueh gŭ tâm ntŭk kloh ueh Păng.

⁷ Hơi noi deh lĕ mpôl băl bunuyh, mât ton hom ma Brah Yêhôva, Mplơ̆ hom nau chrêk rmah jêh ri nau brah ma Brah Yêhôva.

⁸ Mplơ̆ hom nau chrêk rmah ma Brah Yêhôva tâm di ma amoh Păng. Djôt leo hom ndơ ƀư brah lăp tâm nkual Păng.

⁹ Nkrơ̆ hom ma nau kloh ueh jêh ri yơk mbah ma Brah Yêhôva; Ơ lĕ rngôch phung ta neh ntu, râm nsâr hom tanăp Păng.

¹⁰ Mbơh hom ta nklang lĕ bri dak pô aơ: “Brah Yêhôva chiă uănh! Neh ntu dơi ndâk nâp, mâu dơi mpât n'gơ ôh. Păng mra phat dôih lĕ mpôl băl bunuyh tĭng nâm nau di.”

¹¹ Ăn lĕ ndâr trôk maak, jêh ri neh ntu hâk răm, Ăn dak mƀŭt jêh ri lĕ rngôch mpa tâm Păng ngrông huy.

¹² Ăn mir jêh ri lĕ rngôch ndơ tâm nây răm maak da dê. Rnôk nây tơm si tâm bri mra troh maak

¹³ Tanăp Brah Yêhôva; yorlah Păng dôl văch, Păng dôl văch gay phat dôih neh ntu; Păng sŏk nau sŏng srăng gay phat dôih neh ntu, Sŏk nau ngăn gay phat dôih lĕ rngôch mpôl băl bunuyh.