Nau Mprơ Ơm 95 - Nau Brah Ndu Ngơi 2023

Nơm nchih kuăl lĕ rngôch bunuyh yơk mbah jêh ri tông bâr Kôranh Brah

¹ Văch hom mprơ maak ma Brah Yêhôva, Sŏk bâr troh maak ma Lŭ Toyh nau tâm rklaih he.

² Ăn he văch tanăp Păng ma nau tâm rnê lah ueh, Jêh ri troh maak mprơ tâm rnê ma Păng.

³ Yorlah Brah Yêhôva jêng Brah Ndu dŭt toyh, Jêng Hađăch dŭt prêh ta klơ lơn ma lĕ rngôch brah.

⁴ Lĕ brŏng jru neh ntu gŭ tâm ti Păng da dê; Lĕ yôk jêng ndơ Păng;

⁵ Dak Mƀŭt jêng ndơ Păng yorlah Păng njêng jêh dak mƀŭt nây; Bi ma neh sơh yor ti Păng yơh ƀư.

⁶ Văch hom kŭnh gay yơk mbah ma Brah Yêhôva; Chon mon hom kômâk tanăp Nơm Rhăk Njêng he!

⁷ Yorlah Păng jêng Brah Ndu he: He jêng phung ƀon lan tâm ndrêch gơ̆ nse Păng Jêh ri jêng phung biăp ti Păng têk ndrêng. Nar aơ tơlah khân ay may iăt bâr Păng,

⁸ Lơi ƀư dăng ôh nuih n'hâm khân may nâm bu ta Mêriba, Nâm bu ta nar Masa tâm bri rdah.

⁹ Jêng ntŭk phung chô yau khân may rlong uănh jêh Gâp, Sek uănh Gâp jêh ri saơ kan Gâp.

¹⁰ Tâm puăn jât năm, Gâp tâm rmot ma phung mpôl băl aơ, Gâp lah: “Nây jêng du phung ƀon lan vĭ nhhơt, Mâu gĭt năl ôh trong Gâp.”

¹¹ Yor nây, Gâp ji nuih ton pô aơ: “Khân păng mâu mra lăp tâm nau Gâp rlu ôh.”