Nau Mprơ Ơm 94 - Nau Brah Ndu Ngơi 2023

Dăn Brah Yêhôva plơng bôk ma phung ƀon lan Păng

¹ Ơ Brah Yêhôva jêng Brah Ndu, ma nau plơng bôk jêng ndơ May, Ơ Brah Ndu, nau plơng bôk jêng ndơ May, dăn sol ang nau chrêk rmah May.

² Ơ Kôranh jêng phat dôih ma neh ntu, Dâk hom har plơng khư ma phung sưr rlau.

³ Ơ Brah Yêhôva, phung mhĭk geh nau maak mro Ndah nâm jŏ gơm maak?

⁴ Khân păng ngơi lĕ nau sưr; Lĕ rngôch phung mhĭk ngơi blă blơ da dê.

⁵ Ơ Brah Yêhôva, khân păng jot hăch phung ƀon lan May, Ƀư rêh ni ma drăp ndơn May.

⁶ Khân păng tâm rmot phung bu ur ndrô jêh ri bu năch, Nkhĭt lơi phung kon đơi.

⁷ Khân păng lah: “Brah Yêhôva mâu mra saơ ôh, Brah Ndu Yakôb mâu mĭn rmiăng treng uănh!”

⁸ Aơ phung rluk tâm phung ƀon lan, mĭn rvê hom; Ơ phung rluk, ndah jŏ khân may mra jêng phung blau mĭn?

⁹ Nơm njêng jêh trôm tôr mâu mra tăng lĕ? Nơm njêng jêh măt mâu mra saơ lĕ?

¹⁰ Nơm nduyh nkra lĕ bri dak Mâu mra tâm rmal hĕ? Păng jêng Nơm ăn nti nau gĭt rbăng ma kon bunuyh.

¹¹ Brah Yêhôva gĭt năl lĕ nau mĭn kon bunuyh, Khân păng knŏng jêng nau dơm dam.

¹² Ơ Yêhôva, ueh maak yơh ma bunuyh geh nau Păng nduyh nkra Jêh ri nti nau vay May ăn,

¹³ Gay ăn ma păng geh nau rlu tâm nar mhĭk, Kŏ tât lôch jêh bu kuyh ntu ma phung mhĭk.

¹⁴ Yorlah Brah Yêhôva mâu mra chalơi ôh phung ƀon lan Păng, Mâu lĕ Păng chalơi drăp ndơn Păng.

¹⁵ Nau di mra plơ̆ sĭt ma nau phung sŏng srăng, Jêh ri lĕ rngôch phung geh nuih n'hâm sŏng mra tĭng nau nây.

¹⁶ Mbu mra dâk yor ma gâp, tâm rdâng ma phung ƀai? Mbu nơm dâk koh dŏng gâp, tâm rdâng đah phung janh ƀai?

¹⁷ Tơlah Brah Yêhôva mâu kơl gâp, Pôri huêng gâp gơnh jêh sĭt tâm ntŭk bri gŭ rklăk.

¹⁸ Ơ Brah Yêhôva, tơlah gâp lah: “Jâng gâp chêh prah” Pôri nau ueh May kuăn rdâng gâp.

¹⁹ Tơlah nuih n'hâm gâp bêng ma nau mĭn rvê Pôri nau May bonh leng ƀư maak huêng gâp.

²⁰ Phung chiă uănh djơh mhĭk dŏng nau vay ƀư ma phung ƀon lan geh nau rêh ni Di lĕ May tâm rnglăp đah khân păng?

²¹ Khân păng tâm rgum gay ƀư mhĭk ma nau rêh bunuyh sŏng srăng Jêh ri tâm rmal nkhĭt phung mâu geh nau tih.

²² Ƀiălah Brah Yêhôva jêng pôih nâp ma gâp, Brah Ndu jêng lŭ toyh king n'gang gâp.

²³ Păng mra har plơng ma khân păng yor nau ƀai khân păng, Jêh ri ƀư rai khân păng yor nau djơh mhĭk khân păng; Yêhôva Brah Ndu hên mra ƀư rai khân păng.