Nau Mprơ Ơm 91 - Nau Brah Ndu Ngơi 2023

Nau đăp mpăn tâm Nơm Dŭt Prêh

¹ Mbu nơm gŭ tâm ntŭk ndâp Nơm Dŭt Prêh. Mra dơi gŭ tâm dâng gui Nơm Geh Lĕ Nau Brah.

² Gâp mra lah ma Brah Yêhôva pô aơ: “May jêng ntŭk nde krap jêh ri jêng pôih nâp ma gâp; Ăt jêng Brah Ndu gâp, gâp rnơm nsing tâm May.”

³ Yorlah Păng mra tâm rklaih may bơh dăk sĭm, Jêh ri bơh nau ji tưp ƀư rai.

⁴ Păng mra sŏk rsau Păng king n'gang may Jêh ri may mra du krap tâm dâng năr Păng; Nau răp jăp Păng jêng khêl toyh jêh ri khêl jê̆ may.

⁵ May mâu mra klach ôh ma nau djơh mhĭk dôl măng Mâu lah hăr mpăr dôl nar,

⁶ Mâu lah nau ji tưp tâm nau ngo Mâu lah nau rai yot ƀư rai dôl nklang bôk nar.

⁷ Mra geh du rbăn nuyh mra prah ta meng may, Jêh ri rmưn nuyh prah pa ma may. Ƀiălah nau mhĭk mâu mra tât dăch may ôh.

⁸ May knŏng sŏk uănh ma măt may Jêh ri mra saơ nau mplơ̆ sĭt ma phung mhĭk.

⁹ Yorlah may rnơm jêh ma Brah Yêhôva ƀư ntŭk gŭ krap Jêh ri Nơm Dŭt Prêh ƀư ntŭk gŭ,

¹⁰ Yor nây mâu mra geh du ntil ndơ mhĭk tât ma may ôh, Mâu lĕ mra geh du ntil nau ji tưp hăn dăch ngih bok may.

¹¹ Yorlah Păng mra ăn nau ntrŭnh ma phung tông mpăr Păng Mât mray may tâm lĕ trong may.

¹² Tông mpăr mra chông may ma mpang ti khân păng Klach lah jâng may geh chêh ta lŭ lĕ.

¹³ May mra chuat hăn ta klơ yau mŭr jêh ri bêh rmâng; Bi ma yau mŭr kon jêh ri bêh may mra jot tâm dâng ma jâng.

¹⁴ Yorlah păng rŏng ma Gâp yor nây Gâp mra tâm rklaih păng; Gâp mra king n'gang păng yorlah păng gĭt năl amoh Gâp.

¹⁵ Păng mra kuăl mbơh sơm ma Gâp, Gâp mra plơ̆ lah ma păng; Tâm nau rêh ni, Gâp mra gŭ ndrel păng, Tâm rklaih păng jêh ri khlay yơk ma păng.

¹⁶ Gâp mra ăn păng hơm mpay rêh jŏ Jêh ri ntĭm ma păng saơ nau Gâp tâm rklaih.