Nau Mprơ Ơm 9 - Nau Brah Ndu Ngơi 2023

Tâm rnê lah ueh nau sŏng srăng Brah Ndu

Nau Mprơ Ơm Y-Đavit, ƀư nchih ăn ma nơm gai mprơ, tĭng bâr “Mutlabên”

¹ Gâp mra tâm rnê lah ueh Brah Yêhôva ma lĕ nuih n'hâm; Gâp mra nkoch tay lĕ kan khlay Păng.

² Ơ Nơm Dŭt Prêh, Gâp mra hâk maak jêh ri răm rhơn tâm May; Gâp mra mprơ tâm rnê ma amoh May.

³ Tơlah Kôranh Brah mpơl, phung rlăng gâp chuat rŭch, Khân păng mra chêh prah jêh ri bu ƀư rai.

⁴ Yorlah Kôranh Brah koh dŏng nau dơi geh di ma gâp; Kôranh Brah gŭ ta klơ sưng hađăch jêh ri phat dôih ma nau sŏng.

⁵ Kôranh Brah hŏ nduyh jêh lĕ bri dak, ƀư rai phung mhĭk, Lâm lĕ n'ho ro amoh khân păng.

⁶ Lĕ phung rlăng bu hŏ ƀư rai n'ho ro jêh; Kôranh Brah ƀư rlâm ƀon khân păng; Nau ndray kah gĭt ma khân păng ăt rai lôch jêh.

⁷ Ƀiălah Brah Yêhôva chiă uănh n'ho ro; Păng ndâk nkra sưng Păng gay ma phat dôih.

⁸ Păng mra phat dôih neh ntu tĭng nau sŏng srăng, Sŏk nau di jêh ri phat dôih phung ƀon lan.

⁹ Brah Yêhôva jêng ntŭk krap ma phung bu tŭn jot, Jêng ntŭk krap n'gang săk tâm rnôk rêh ni.

¹⁰ Ơ Brah Yêhôva, Phung gĭt amoh May mra rnơm nsing ma May, Yorlah May mâu mâp chalơi ôh bunuyh tĭng joi May.

¹¹ Mprơ tâm rnê hom ma Brah Yêhôva jêng Nơm gŭ tâm ƀon Siôn! Mbơh hom nau kan Păng ta nklang phung ƀon lan.

¹² Yorlah Nơm plơng bôk ma mham kah gĭt ma phung rêh ni; Păng mâu chuêl ôh nau khân păng kuăl gay sâm rklaih.

¹³ Ơ Brah Yêhôva, dăn yô̆ nđach an ma gâp! Dăn treng uănh ma nau rêh ni yor phung rlăng gâp hŏ ƀư jêh; May jêng Nơm chông leo gâp tă bơh mpông pêr nau khĭt,

¹⁴ Gay ma gâp mbơh tay lĕ nau tâm rnê ma Kôranh Brah; Ta mpông ƀon Kon Bu Ur Siôn, Gâp răm maak ma nau May tâm rklaih.

¹⁵ Phung ƀon lan tŭp jêh tâm ntu jru khân păng hŏ kuyh jêh; Jâng khân păng văk tâm nhuăl khân păng nơm nthăng jêh.

¹⁶ Brah Yêhôva tâm mpơl êng Păng Nơm rgăn đah nau di; Phung mhĭk geh dăk yor ti khân păng nơm sân jêh. (Higaiôn. Sêla)

¹⁷ Phung mhĭk mra hăn lăp ta ƀon phung khĭt, Lĕ rngôch phung ƀon lan chuêl Brah Ndu tâm ban pônây lĕ.

¹⁸ Bunuyh pah pưt bu mâu mra chuêl n'ho ro, Jêh ri phung o ach mâu geh roh nau kâp gân ƀaƀơ ôh.

¹⁹ Ơ Brah Yêhôva, dâk hôm! Lơi ăn bunuyh tih dơi ôh; Ăn lĕ bri dak dơn nau phat dôih tanăp măt May.

²⁰ Ơ Brah Yêhôva; ƀư ăn khân păng klach krit. Ăn phung ƀon lan gĭt khân păng jêng knŏng bunuyh nglay săk. (Sêla)