Nau Mprơ Ơm 88 - Nau Brah Ndu Ngơi 2023

Kuăl dăn Kôranh Brah tâm rklaih gâp bơh khĭt

Nau Mprơ Ơm kon sau Kôra. Nau mprơ ƀư nchih ma nơm gai mprơ, tĭng bâr Mahala Lêanô. Hêman ti mprơ, bunuyh Êsrahit

¹ Ơ Yêhôva Brah Ndu jêng nau tâm rklaih gâp, Măng nâm nar gâp kuăl dăn tanăp May.

² Ăn nau gâp mbơh sơm hao tât tanăp măt May; Dăn May rkêng tôr iăt nau gâp vah vơl.

³ Yorlah huêng gâp bêng ma nau rêh ni, Nau rêh gâp hŏ dăch ta ƀon phung khĭt.

⁴ Bu kơp gâp ndrel ma phung hăn jŭr ntu môch; Gâp jêng nâm bu du huê bu klâu mâu geh nau ktang,

⁵ Bu chuêl ta nklang phung khĭt Tâm ban ma phung bu nkhĭt njor tâm môch, Ƀiălah May mâu hôm kah gĭt đŏng ôh, Jêng phung mƀăr lơi jêh bơh ti May.

⁶ May hŏ dơm jêh gâp njor tâm ntu jru, Tâm ntu jru ngo klĕng.

⁷ Nau May ji nuih ƀư jâk ta klơ gâp, May ƀư rêh ni gâp ma lĕ rngôch dak sial njach. (Sêla)

⁸ May ƀư phung mĭt jiăng gâp du ngai đah gâp; Gâp jêng du ntil ndơ ƀơ̆ ƀơch ma khân păng. Bu krŭng gâp, gâp mâu dơi klaih ôh.

⁹ Măt gâp hươi rgănh yor nau rêh ni; Ơ Brah Yêhôva! Gâp kuăl mbơh sơm ma May ăp nar, Jêh ri yơr jêh ti mpeh ma May.

¹⁰ Ma phung khĭt hĕ May ƀư nau mbên khlay? Phung khĭt mra dâk gay tâm rnê ma May lĕ? (Sêla)

¹¹ Nuih n'hâm ueh May dơi nkoch mbơh tâm môch lĕ? Mâu lah nau răp jăp May dơi mbơh nkoch tâm ntu jru lĕ?

¹² Lĕ nau mbên khlay May dơi gĭt tât ntŭk ngo klĕng lĕ? Mâu lah nau sŏng srăng Kôranh Brah dơi geh tâm mpơl tâm n'gor hŏ chuêl jêh?

¹³ Ƀiălah ơ Brah Yêhôva! Bi ma gâp, gâp vơh vơl ma May; Mbăt ang ôi, nau gâp mbơh sơm tât tanăp May.

¹⁴ Ơ Brah Yêhôva! Mâm May chalơi huêng gâp, Jêh ri pôn muh măt May ma gâp?

¹⁵ Ntơm bơh hôm mom, gâp geh nau rêh ni bơi ma khĭt; May ƀư ma gâp krit ngăn jêh ri rŭng răng.

¹⁶ Nau May ji nuih jot mbet ta gâp, May djôt nau klach krit tât gay ma ƀư rai gâp.

¹⁷ Ăp nar lĕ nau nây nchueng jŭm gâp nâm bu dak lip, Nkŭm lơi gâp tă bơh puăn njônh.

¹⁸ May ƀư phung mĭt jiăng du ngai đah gâp, Knŏng nau ngo jêng băl ma gâp.