Nau Mprơ Ơm 86 - Nau Brah Ndu Ngơi 2023

Dăn Kôranh Brah sâm kơl gay tâm rdâng đah phung rlăng

Nau Y-Đavit mbơh sơm

¹ Ơ Brah Yêhôva! Dăn rkêng tôr plơ̆ lah ma gâp, Yorlah dôl gâp geh nau o ach jêh ri pưt kƀah.

² King n'gang huêng gâp, yorlah gâp jêng bunuyh răp jăp; Ơ Brah Ndu gâp! Dăn tâm rklaih hom oh mon May, Jêng nơm hôm rnơm nsing ma May.

³ Ơ Kôranh Brah! Yô̆ nđach ma gâp, Yorlah ăp nar gâp kuăl dăn ma May.

⁴ Dăn ƀư ma huêng oh mon May geh nau maak Yor ma May Ơ Kôranh Brah! Huêng gâp kâp gân May.

⁵ Ơ Kôranh Brah! May jêng ueh, bêng ma yô̆ an, Ăn bêng nau ueh ma phung kuăl dăn ma May.

⁶ Ơ Yêhôva, rkêng tôr iăt nau gâp mbơh sơm, Dăn rkêng tôr tât ta bâr gâp vơh vơl.

⁷ Tâm nar rêh ni, gâp kuăl mbơh sơm ma May, Yorlah May mra mplơ̆ lah nau gâp.

⁸ Ơ Kôranh Brah! Tâm lĕ rngôch brah mâu geh nơm tâm ban ma May, Mâu geh lĕ nau kan tâm ban ma nau kan May.

⁹ Lĕ rngôch phung mpôl băl May hŏ rhăk njêng jêh Mra văch yơk mbah tanăp măt May Jêh ri tâm rnê amoh May.

¹⁰ Yorlah May dŭt toyh, ƀư nau kan khlay, Knŏng êng May dơm jêng Brah Ndu.

¹¹ Ơ Yêhôva, sâm nti gâp trong May, Pôri gâp mra hăn tâm nau ngăn May; Ăn nuih n'hâm gâp ăn blau klach yơk ma amoh May.

¹² Ơ Kôranh Brah jêng Brah Ndu gâp, ma lĕ nuih n'hâm gâp mprơ tâm rnê May, Mât ton amoh May mro mrăng.

¹³ Yorlah nuih n'hâm ueh May toyh ngăn ma gâp; May tâm rklaih jêh huêng gâp bơh brŏng jru ƀon phung khĭt.

¹⁴ Ơ Brah Ndu, phung sưr hao tâm rdâng jêh ma gâp, Du phung bunuyh ƀai joi gay ƀư rai ma huêng gâp; Khân păng mâu mĭn ôh May gŭ tanăp khân păng.

¹⁵ Ƀiălah ơ Kôranh Brah, May jêng Brah Ndu blau yô̆ nđach jêh ri ƀư ueh, Mâu gơnh nuih, bêng ma nuih n'hâm ueh jêh ri nau nanê̆ ngăn.

¹⁶ Ơ! Dăn May uănh ma gâp jêh ri yô̆ nđach gâp; Ăn nau ktang May ma oh mon May Jêh ri tâm rklaih kon bu klâu oh mon bu ur May.

¹⁷ Dăn May ăn du nau tâm mbên ma nau May yô̆ ma gâp Gay ma phung tâm rmot ma gâp dơi saơ nau mbên nây jêh ri bêk prêng, Yorlah Ơ Brah Yêhôva, May yơh hŏ kơl jêh ri bonh leng gâp.