Nau Mprơ Ơm 85 - Nau Brah Ndu Ngơi 2023

Kuăl dăn Brah Ndu rdâk njêng tay phung ƀon lan Păng

Nau Mprơ Ơm kon sau Kôra, ƀư nchih ma nơm gai mprơ

¹ Ơ Brah Yêhôva, May ăn jêh nau ueh ma n'gor May nơm; May njŭn sĭt jêh phung bu nă Yakôb.

² May yô̆ an jêh phung djơh mhĭk ma phung ƀon lan May Jêh ri nkŭm lĕ rngôch nau tih khân păng. (Sêla)

³ May sŏk sĭt lơi jêh nau May ji nuih, Ƀư bah nau May ji nuih.

⁴ Ơ Brah Ndu jêng nau tâm rklaih hên, Dăn rdâk njêng hên jêh ri nsrŭng nau ji nuih ta klơ hên.

⁵ May mra ji nuih ma hên mro mrăng lĕ? Nau May ji nuih mra jŏ jong tât ma lĕ rngôch rnôk hĕ?

⁶ May mâu mra ƀư nau rêh ma hên Gay ma phung ƀon lan May răm maak tâm May lĕ?

⁷ Ơ Brah Yêhôva, dăn mpơl nau ueh May ăn ma hên, Jêh ri ăn ma hên nau May tâm rklaih.

⁸ Gâp mra iăt moh nau Yêhôva Brah Ndu lah, Yorlah Păng mra lah nau đăp mpăn ma phung ƀon lan păng jêh ri phung răp jăp đah Păng; Ƀiălah khân păng mâu dơi plơ̆ tay nau rluk đŏng ôh.

⁹ Nanê̆ nau Păng tâm rklaih gŭ dăch phung klach yơk ma Păng, Gay ma nau chrêk rmah Păng dơi gŭ tâm n'gor bri he mro.

¹⁰ Nau yô̆ nđach jêh ri nau nanê̆ ngăn tâm mâp ndrel jêh; Nau sŏng srăng jêh ri nau đăp mpăn hŏ tâm chŭm jêh.

¹¹ Nau nanê̆ ngăn bơh tâm dâng neh hao vơr; Nau sŏng srăng gŭ uănh bơh klơ trôk.

¹² Di yơh, Brah Yêhôva mra ăn ndơ ueh, Jêh ri neh he mra geh kao play.

¹³ Nau sŏng srăng mra hăn tanăp Păng, Jêh ri nkra trong ăn jâng Păng chuat.