Nau Mprơ Ơm 84 - Nau Brah Ndu Ngơi 2023

Nơm nchih ŭch geh yơk mbah Kôranh Brah tâm ngih brah kloh ueh

Nau Mprơ Ơm phung kon sau Kôra, ƀư nchih ma nơm gai mprơ, dŏng ma ndơ goh “Gitit”

¹ Ơ Brah Yêhôva ma phung tahan, Ntŭk May gŭ khư rŏng ngăn,

² Huêng gâp ŭch ngăn kŏ tât huăr hươi Ma nkual nhuang Brah Yêhôva; Nuih n'hâm jêh ri nglay săk gâp hă bâr mprơ tâm rnê Ma Brah Ndu gŭ rêh mro mrăng.

³ Ơ Brah Yêhôva ma phung tahan Jêng Hađăch gâp jêh ri jêng Brah Ndu gâp, Nđâp ma sĭm srai ăt dơi joi du ntŭk gay gŭ Jêh ri sĭm rlêng ăt dơi joi du ntŭk gay ƀư rsuăn păng deh kon, Jêng êp ntŭk nơng ƀư brah May.

⁴ Ueh maak yơh phung dơi gŭ tâm ngih May! Khân păng mra mprơ tâm rnê ma May mro mrăng. (Sêla)

⁵ Ueh maak yơh ma bunuyh geh nau ktang tâm May, Jêh ri nuih n'hâm khân păng let mpeh ma gâp trong hăn ta Siôn.

⁶ Tơlah dôl hăn rgăn rlŭng nhĭm nhhiăng. Khân păng njêng rlŭng nây jêng dak n'hor; Dak mih bôk rah nkŭm păng ma nau ueh uĭn.

⁷ Khân păng hăn tât, nau ktang lơ hâu hao, Kŏ tât khân păng mpơl măt tanăp Brah Ndu ta Siôn.

⁸ Ơ Yêhôva Brah Ndu ma phung tahan, dăn iăt nau gâp mbơh sơm; Ơ Brah Ndu Yakôb, dăn May rkêng tôr iăt. (Sêla)

⁹ Ơ Brah Ndu jêng khêl ma hên; Dăn uănh muh măt ma nơm May dơi tŏ dak ƀâu kah.

¹⁰ Yorlah du nar tâm nkual nhuang May Jêng ueh lơn ma du rbăn nar ta ntŭk êng. Gâp hŏ săch jêh ŭch lơn ƀư bunuyh gak njrăng mpông tâm ngih Brah Ndu Rlau lơn jêng gŭ tâm ngih bok phung ƀai.

¹¹ Yorlah Yêhôva Brah Ndu jêng nar jêh ri khêl; Brah Yêhôva mra ăn nau yô̆ jêh ri nau chrêk rmah; Păng mâu dun du ntil nau ueh ôh Ăn ma phung gŭ rêh nŭm rĭng.

¹² Ơ Brah Yêhôva ma phung tahan, Ueh maak yơh ma bunuyh rnơm nsing ma May!