Nau Mprơ Ơm 83 - Nau Brah Ndu Ngơi 2023

Kuăl dăn ma Brah Ndu ƀư rai phung rlăng đah phung ƀon lan Păng

Nau Mprơ. Nau Mprơ Ơm Y-Asap

¹ Ơ Brah Ndu! Lơi ta gŭ klăk klêm ôh. Ơ Brah Ndu! Lơi ta gŭ rklăk ôh, mâu lah gŭ ôh.

² Yorlah ri, phung rlăng May ƀư nau uh ah, Jêh ri phung tâm rmot đah May n'gơr bôk.

³ Khân păng nchră mĭn ƀư mhĭk ma phung ƀon lan May, Nchră ƀư ndrăng khân păng nơm gay tâm rdâng ma phung May king n'gang.

⁴ Khân păng lah: “Văch hom nkhĭt lĕ khân păng bơh lĕ bri dak, Gay ma khân păng mâu hôm kah gĭt amoh Israel đŏng ôh.”

⁵ Yorlah khân păng tâm nchră du nuih n'hâm ndrăng khân păng Njêng nau tâm rnglăp tâm rdâng đah May:

⁶ Lĕ ngih bok Êđôm jêh ri phung Ismaêl, Phung Môap jêh ri phung Hagrit,

⁷ Phung Gêbal, phung Ammôn jêh ri phung Amalek, Phung Philistin đah phung gŭ tâm ƀon Tyre;

⁸ Phung Asiri ăt tâm rnglăp đah khân păng Jêh ri kơl phung kon Y-Lot ma lĕ nuih n'hâm. (Sêla)

⁹ Sek uănh hom ma khân păng nâm bu ma Madian, Nâm bu ma Sisêra jêh ri ma Jabin ta n'hor dak Kisôn,

¹⁰ Jêng phung bu ƀư nkhĭt ta Ên-Dôr Jêh ri jêng ek ma neh.

¹¹ Ƀư hom ma phung ndrŏng khân păng nâm bu ma Ôrep jêh ri ma Sêep. Jêh ri lĕ rngôch kôranh toyh khân păng nâm bu ma Sêbah jêh ri ma Salmuna,

¹² Yorlah khân păng lah pô aơ: “Sŏk pit lĕ ntŭk ndrêch gơ̆ Brah Ndu Ƀư drăp ndơ ma he.”

¹³ Ơ Brah Ndu gâp! Ƀư ma khân păng jêng nâm bu phŭt chuănh đô̆, Nâm bu njŏk rhe tanăp vănh blông.

¹⁴ Nâm bu ŭnh sa bri, Nâm bu ŭch sa yôk tâm ban lĕ,

¹⁵ Pôri, ăn May sŏk vănh blông tĭng khân păng, Jêh ri nkrit nhhu khân păng ma sial phŭt pônây lĕ.

¹⁶ Ơ Brah Yêhôva, ƀư ma khân păng prêng muh măt, ƀơ̆ ƀơch Gay ma khân păng joi amoh May.

¹⁷ Ăn khân păng bêk prêng jêh ri ƀư rŭng n'ho ro; Ăn bu ƀư mhĭk ma khân păng jêh ri roh yot,

¹⁸ Gay ma khân păng gĭt pô aơ jêng knŏng du huê May Nơm yơh, Amoh May jêng Brah Yêhôva, Jêng Nơm Dŭt Prêh chiă uănh tâm lam neh ntu.