Nau Mprơ Ơm 81 - Nau Brah Ndu Ngơi 2023

Nau ueh Brah Ndu jêh ri nau dăng bôk phung ƀon lan Israel

Nau mprơ Y-Asap, ƀư nchih ăn ma nơm gai mprơ, dŏng ma ndơ goh “Gitit”

¹ Sŏk hom bâr mprơ ăn huy ma Brah Ndu jêng nau dăng ktang phung he; Răm maak hom đah bâr mprơ ma Brah Ndu Yakôb.

² Sŏk hom ma bâr mprơ jêh ri goh gâr jê̆, Kreh gong rêng găl jêh ri uh rlet.

³ Uh nŭng hom dôl khay mhe luh, Rnôk khay bŏng jêh ri ăp ta nar he tâm rƀŭn.

⁴ Yorlah nây jêng nau vay dăp ma phung Israel, Du nau dăp bơh Brah Ndu Yakôb

⁵ Păng rdâk nau nây jêng nau mbơh ma Yôsep Tơlah păng hăn tâm lơh đah bri Êjipt. Gâp tăng du ntil nau ngơi gâp mâu gĭt:

⁶ “Gâp sŏk jêh ndơ anh jâk bơh săng nglik păng; Jêh ri mƀơk bơh bĭ jâk bơh ti păng.”

⁷ “Tâm nau rêh ni, may kuăl pôri Gâp mra tâm rklaih may, Bơh ntŭk ndâp nglaih gŭ, Gâp mplơ̆ lah nau may. Jêh ri rlong uănh may ta dak n'hor Mêriba. (Sêla)

⁸ Ơ phung ƀon lan Gâp, gŭ iăt hom, Gâp lah ma may: Ơ Israel, di lĕ may gŭ iăt Gâp!

⁹ Ta nklang may lơi ta geh brah êng ôh, Mâu lĕ may chon mbah tanăp brah bu năch.

¹⁰ Gâp jêng Yêhôva Brah Ndu may, Nơm njŭn leo jêh may luh bơh bri Êjipt. Hă hom mbung may ăn huy jêh ri Gâp mra ƀư ăn bêng.

¹¹ Ƀiălah phung ƀon lan Gâp mâu iăt bâr Gâp, Phung Israel mâu tông bâr Gâp ôh.

¹² Yor nây, Gâp jao khân păng ma nau nuih n'hâm dăng khân păng, Gay ma khân păng hăn tĭng nâm khân păng nơm mĭn.

¹³ Ơ! Di lĕ phung ƀon lan Gâp iăt Gâp! Di lĕ Israel dơi hăn tâm trong Gâp!

¹⁴ Mâu jŏ ôh Gâp ƀư ma phung rlăng khân păng kŭnh bôk da dê, Jêh ri Gâp plơ̆ tâm rdâng đah phung rlăng ma khân păng.

¹⁵ Phung tâm rmot ma Yêhôva mra pah kan ma Păng Bi ma phung ƀon lan Gâp mra hôm e n'ho ro.

¹⁶ Gâp mra siăm khân păng ma ba kah lơn, Jêh ri ăn ma khân păng dơi hơm mpay ma dak sŭt ta ntŭk lŭ toyh.”