Nau Mprơ Ơm 80 - Nau Brah Ndu Ngơi 2023

Nơm nchih dăn Kôranh Brah tâm rklaih phung ƀon lan Păng bơh nau rêh ni

Nau Mprơ Ơm Y-Asap, ƀư nchih ma nơm gai mprơ tĭng bâr “kao si ueh nau tâm rnglăp”

¹ Ơ Nơm mât njrăng biăp Israel, dăn rkêng tôr iăt! May jêng Nơm njŭn leo Yôsep nâm bu du phung biăp, Ơ Nơm gŭ ta klơ phung Chêrubim, dăn May sol ang.

² Tanăp Êphraim, Benjamin jêh ri Manasê. Dăn ƀư nau brah May Jêh ri văch tâm rklaih hên.

³ Ơ Brah Ndu, dăn ndâk njêng mhe tay hên, Jêh ri ƀư ăn nchrat ang măt May ta klơ hên pôri hên mra dơi rklaih.

⁴ Ơ Yêhôva Brah Ndu ma phung tahan, Ndah hôm jŏ May ji nuih ma nau phung ƀon lan May mbơh sơm?

⁵ May mât rong jêh khân păng ma ƀănh dak măt Jêh ri ăn khân păng nhêt dak măt bêng kachok.

⁶ May ƀư hên jêng ndơ tâm djrel tâm rlăch ma phung chiau meng hên; Jêh ri phung rlăng gơm mưch hên ndrăng khân păng nơm.

⁷ Ơ Brah Ndu ma phung tahan, dăn ndâk njêng mhe tay hom hên Jêh ri ƀư ăn muh măt May sol ang ta klơ hên pôri hên mra dơi rklaih.

⁸ Ntơm bơh n'gor Êjipt, May djôt sĭt jêh du mlâm tơm krăk ƀâu; May mprơh phung mpôl băl jêh ri tăm tơm nây.

⁹ May kai pŏk neh ăn păng, Păng njŭr reh jêh ri hung bêng ta klơ neh.

¹⁰ Lĕ yôk geh gui păng nkŭm Jêh ri n'gĭng păng jêng nâm bu phung tơm Sêdar Brah Ndu.

¹¹ N'gĭng păng vơr tât ta dak mƀŭt, Jêh ri nkeh păng huy tât dak krong.

¹² Mâm ƀư May ƀư rai n'gar păng Gay ma phung prot ta nây pĕ lơi play păng?

¹³ Phung rke krŏng kăp sa păng, Jêh ri phung mpa bri sa păng.

¹⁴ Ơ Brah Ndu ma phung tahan! Dăn plơ̆ văch hom, Uănh bơh trôk ta klơ, treng uănh Jêh ri chop khâl tơm krăk ƀâu aơ,

¹⁵ Jêng tơm krăk ƀâu ti ma May tăm jêh, Jêh ri jêng nkeh May hŏ ăn jêh nau ktang.

¹⁶ Tơm play krăk ƀâu nây ŭnh sa jêh ri bu koh; Yorlah nau muh măt May nduyh lah, khân păng mra rai yot.

¹⁷ Ăn ti May kơl bunuyh ma ti ma May, Nây jêng kon bunuyh May ăn jêh ma May nau ktang.

¹⁸ Jêh nây hên mâu mra du bơh May đŏng ôh; Dăn ƀư ma hên dơi dâk rêh tay, pôri hên mra kuăl amoh May.

¹⁹ Ơ Yêhôva Brah Ndu ma phung tahan, ndâk njêng mhe tay hom hên, Ăn muh măt May sol ang ta hên pôri hên mra dơi rklaih.