Nau Mprơ Ơm 79 - Nau Brah Ndu Ngơi 2023

Dăn Kôranh Brah yô̆ nđach ma ƀon Yêrusalem

Nau Mprơ Ơm Y-Asap

¹ Ơ Brah Ndu! Phung mpôl băl bri êng lăp jêh tâm drăp ndơn May; Ƀư ƀơ̆ ngih brah kloh ueh May; Jêh ri ƀư ma ƀon Yêrusalem jêng du mbŭch ƀrĭk hăch.

² Khân păng hŏ klŭp jêh săk jăn khĭt phung oh mon May Ƀư jêng ndơ sa phung sĭm tâm trôk. Mƀăr đŏng mlay puăch phung răp jăp đah May ma phung mpa bri ta klơ neh.

³ Khân păng nkhŭt mham phung ƀon lan luh tâm ban ma dak Lam ntŭk tâm ƀon Yêrusalem, Mâu geh bunuyh tâp brôi khân păng ôh.

⁴ Hên jêng ndơ bu tâm rmot jêh ma phung chiau meng hên, Ndơ suai rak jêh ri ndơ gơm mưch ma phung gŭ jŭm hên.

⁵ Ơ Brah Yêhôva! Ndah jŏ? May mra ji nuih mro mrăng lĕ? Nau May ntôn mra hit nâm bu ŭnh sa boh?

⁶ Nkhŭt nau May ji nuih ta phung ƀon lan Mâu gĭt May, Jêh ri ta lĕ bri hađăch Mâu kuăl mbơh sơm ma amoh May.

⁷ Yorlah khân păng sa rvăn jêh Yakôb, Jêh ri ƀư rai ntŭk păng gŭ.

⁸ Lơi May kah gĭt tay lĕ nau tih mhĭk phung chô yau hên gay ma rmal hên ôh; Ăn nau May yô̆ nđach văch gơnh vơt rom hên, Yorlah hên rêh ni hâu ngăn ngên.

⁹ Ơ Brah Ndu jêng Nơm tâm rklaih hên, dăn kơl hên, Yorlah nau chrêk rmah tâm amoh May; Dăn May tâm rklaih jêh ri yô̆ ma nau tih hên, Ma yor amoh May.

¹⁰ Mâm ƀư phung mpôl băl lah pô aơ: “Mbah ntŭk Brah Ndu khân păng?” Ăn nau har plơng yor mham phung oh mon May hŏ nkhŭt jêh Dơi ƀư nklang phung ƀon lan tanăp hên.

¹¹ Ăn nau phung bu nă nter vơl tât tanăp May; Tĭng nâm nau brah May dŭt toyh ngăn ngên, Dăn tâm rklaih phung dôl tâm mâp đah nau khĭt.

¹² Ơ Kôranh Brah, dăn mplơ̆ lơi ro ma lĕ bri dak văr jŭm hên bar âk lơn tơ̆ pơh. Ma nau khân păng ƀư mhĭk jêh ma May.

¹³ Bi hên jêng phung ƀon lan May jêh ri jêng phung biăp tâm ndrêch gơ̆ nse May, Hên mra tâm rnê ma May mro mrăng; Ntơm bơh rnôk aơ tât rnôk ri, hên mra mbơh nau mprơ tâm rnê ma May.