Nau Mprơ Ơm 77 - Nau Brah Ndu Ngơi 2023

Brah Ndu gŭ ndrel ma phung ƀon lan Păng tâm nar rêh ni

Nau Mprơ Ơm Y-Asap, ƀư nchih ma nơm gai mprơ tĭng bâr “Jêduthun”

¹ Gâp kuăl nter đah Brah Ndu, Sŏk bâr rle mpeh ma Brah Ndu jêh ri dăn Păng rkêng tôr ma gâp.

² Tâm nar rêh ni, gâp joi Kôranh Brah; Dôl măng, ti gâp yơr ăn sŏng mâu rgănh ôh; Ƀiălah huêng gâp mâu geh nau bonh leng.

³ Gâp kah gĭt ma Brah Ndu jêh ri gâp mra uh ah, lŭng nter; Huêng gâp huăr jêh. (Sêla)

⁴ May kuăn n'gô măt gâp pơk luh; Gâp rŭng răng hâu ngăn ngên, tât gâp mâu dơi ngơi.

⁵ Gâp mĭn rvê ma nar kăl e Jêh ri lĕ năm rlau jêh.

⁶ Dôl măng gâp kah gĭt ma nau gâp mprơ; Gâp gŭ mĭn tâm nuih n'hâm jêh ri ôp êng tâm nuih n'hâm:

⁷ “Kôranh Brah mra chalơi tât n'ho ro lĕ? Păng mâu mra hôm ăn nau ueh lĕ?

⁸ Nau ueh Păng lôch mro măng lĕ? Nau Păng ton roh n'ho ro mâu hôm lĕ?

⁹ Brah Ndu chuêl nau ƀư ueh lĕ? Tâm nau ji nuih, Păng nchăng nâp lơi nau vay yô̆ nđach lĕ?” (Sêla)

¹⁰ Gâp lah, “Nau rêh ni gâp jêng: Ti ma Nơm Dŭt Prêh hŏ rgâl jêng.”

¹¹ Gâp mra kah gĭt mro nau kan Brah Yêhôva; Kah gĭt tât lĕ nau mbên khlay May kăl e;

¹² Ăt mra mĭn rvê ma lĕ rngôch kan May, Jêh ri mĭn ma lĕ nau May ƀư.

¹³ Ơ Brah Ndu, trong May jêng kloh ueh. Geh lĕ brah êng jêng dŭt toyh tâm ban ma Brah Ndu?

¹⁴ May jêng Brah Ndu vay ƀư nau mbên khlay; May tâm mpơl nau brah May ta nklang phung ƀon lan.

¹⁵ May sŏk ti May nơm gay tâm chuai phung ƀon lan May, Nây jêng kon sau Yakôb jêh ri Yôsep. (Sêla)

¹⁶ Ơ Brah Ndu, tơlah lĕ n'hor dak saơ May, Di yơh, tơlah lĕ n'hor dak saơ May jêh ri klach, Jêh ri brŏng jru râm nsâr.

¹⁷ Phung ndâr tŭk nkhŭt dak mih, Tâm trôk nteh nglaih Jêh ri lĕ hăr May mpăr lam ntŭk.

¹⁸ Nteh nglaih May rdah gŭ tâm sial hĭt; Lơp nglaih nchrat tâm neh ntu; Neh ntu n'găr jêh ri nsâr.

¹⁹ Trong May gŭ tâm dak mƀŭt, Lĕ trong May gŭ tâm dak jru, Bi ma têl jâng May bu mâu dơi saơ ôh.

²⁰ May dŏng ti Y-Môis jêh ri Y-Arôn Gay ma njŭn leo phung ƀon lan May nâm bu du phung biăp.