Nau Mprơ Ơm 75 - Nau Brah Ndu Ngơi 2023

Brah Ndu n'hŭch nơm sưr ƀiălah n'hao phung sŏng srăng

Nau Mprơ Ơm Y-Asap. Nau mprơ nti ƀư nchih ma nơm gai mprơ, tĭng bâr “Lơi ta ƀư rai”.

¹ Ơ Brah Ndu, hên tâm rnê lah ueh ma May; Hên tâm rnê lah ueh yor amoh May gŭ dăch. Bu nkoch tay lĕ nau kan khlay May.

² Tât mông Gâp hŏ tâm nal jêh, Gâp yơh mra phat dôih ma nau sŏng.

³ Tơlah neh ntu jêh ri lĕ rngôch phung bunuyh ta klơ neh mpât n'găr Gâp yơh mra mât nâp lĕ meh păng. (Sêla)

⁴ Gâp lah ma phung sưr pô aơ: “Lơi ta sưr ôh,” Jêh ri lah ma phung mhĭk pô aơ: “Lơi ta n'gơr nke klơ;

⁵ Lơi ta n'gơr nke khân may prêh klơ Lơi ta dăng ko gay ma ngơi sưr rlau ôh.”

⁶ Yorlah mâu geh nâm mpeh luh nar, mpeh nhâp nar Mâu lĕ bơh mpeh pa dâng dơi geh nơm yơk.

⁷ Ƀiălah Brah Ndu nơm yơh ƀư nau phat dôih: Păng n'hŭch nơm aơ jŭr, n'hao nơm ri hao.

⁸ Yorlah tâm ti Brah Yêhôva geh du mlâm kachok Bêng ma rlŭk ndrănh, mpŭnh mbuh, Păng kêt lơi kachok nây. Lĕ rngôch phung mhĭk gŭ ta neh ntu mra nhêt da dê, Mra nhêt suăt ndrănh nây kŏ tât djah.

⁹ Ƀiălah gâp mra mbơh nau nây ƀaƀơ, Mra mprơ tâm rnê lah ueh ma Brah Ndu Yakôb.

¹⁰ Gâp mra koh lĕ rngôch nke phung mhĭk Ƀiălah lĕ nke phung sŏng srăng mra dơi n'hao.