Nau Mprơ Ơm 74 - Nau Brah Ndu Ngơi 2023

Nau lŭng nter yorlah bri dak lĕ rai

Nau mprơ nti Y-Asap

¹ Ơ Brah Ndu! Mâm ƀư May chalơi hên ƀaƀơ? Mâm ƀư May ji nuih ma phung biăp tâm ndrêch gơ̆ nse May?

² Ăn May kah gĭt ma phung ƀon lan May hŏ ndâk jêh ntơm bơh kăl e, Phung May tâm chuai jêh gay ƀư jêng drăp ndơn May; Ăn May kah gĭt ma yôk Siôn jêng ntŭk May tă gŭ jêh.

³ Ăn May chuat tât rlau lĕ rngôch ntŭk rlâm rai lĕ: Phung rlăng ƀư rai lĕ jêh lĕ rngôch ndô ndơ tâm ntŭk kloh ueh.

⁴ Phung rlăng May ngrông ta nklang ntŭk tâm rƀŭn; Khân păng ndâk n'hao bok kơ gay ƀư nau tâm mbên.

⁵ Khân păng nâm bu phung kăl tơm si djôt sung yơr leo klơ Chôk tâm bri krŏng mbâl ri.

⁶ Aƀaơ khân păng dŏng sung kŭk jêh ri kon nôp Gay nchah lĕ rngôch ndơ trah mon.

⁷ Khân păng su ntŭk kloh ueh May, Ƀư rlâm jêh ri ƀư ƀơ̆ ntŭk gŭ amoh May.

⁸ Khân păng lah: “Ăn he ƀư rai lĕ khân păng.” Khân păng su lĕ rngôch ngih rƀŭn Brah Ndu tâm n'gor.

⁹ Hên mâu hôm saơ lĕ nau mbên khlay, Mâu hôm geh nơm mbơh lor đŏng ôh; Jêh ri tâm phung hên mâu lĕ nơm gĭt nau aơ ndah nâm jŏ.

¹⁰ Ơ Brah Ndu! Ndah nâm jŏ nơm tâm rdâng mra bêk prêng ma May? Nơm rlăng mra suai ma amoh May mro lĕ?

¹¹ Mâm ƀư May rhuăt lơi ti, nây jêng ti ma May? Ăn yơr hom ti jêh ri ƀư rai lơi khân păng!

¹² Nđâp lah pônây, bơh kăl e, Brah Ndu jêng Hađăch gâp May ƀư nau tâm rklaih lam neh ntu.

¹³ May sŏk nau brah May gay ma rnglah lơi dak mƀŭt, Dong nchah bôk mpa djơh mhĭk tâm dak.

¹⁴ May yơh nchah lơi bôk Lêviathan, Ăn păng ƀư ndơ sông sa ma phung gŭ tâm bri rdah.

¹⁵ May ăn n'hor dak jêh ri tu dak luh dak, Jêh ri ƀư ma lĕ dak krong toyh mra suăt sơh.

¹⁶ Nar jêng ndơ May, măng ăt jêng ndơ May; May rhăk njêng jêh khay jêh ri nar.

¹⁷ May tâm nal jêh lĕ n'har neh ntu, Njêng yan vai jêh ri yan puh.

¹⁸ Ơ Brah Yêhôva, ăn kah gĭt ma nau nơm rlăng suai rak, Jêh ri du mpôl băl rluk ngơi mhĭk ma amoh May.

¹⁹ Lơi jao ôh nau rêh plŭk May ma mpa bri janh; Lơi ta chuêl mro nau rêh phung o ach, jêng phung ƀon lan May.

²⁰ Ăn May uănh tât ma nau May tâm rnglăp, Yorlah lĕ ntŭk ngo klĕng tâm neh ntu jêng ntŭk bêng nau tŭn jot.

²¹ Ăn nơm bu tŭn jot mâu plơ̆ sĭt tâm nau bêk prêng ôh; Ăn phung o ach jêh ri nơm pưt kƀah mprơ tâm rnê ma amoh May.

²² Ơ Brah Ndu, dâk hăn hom koh dŏng nau May ngơi. Ăn kah gĭt tay ma phung rluk suai rak May ăp nar.

²³ Lơi chuêl ôh bâr nter lah phung rlăng đah May, Nau uh ah phung tâm rdâng đah May hao ƀaƀơ.