Nau Mprơ Ơm 73 - Nau Brah Ndu Ngơi 2023

NDROM SAMɃŬT RƠH PE ( Nau Mprơ Ơm 73 – 89 ) Tâm rđĭl nau nglĕ dŭt phung mhĭk jêh ri đah phung sŏng srăng

Nau Mprơ Ơm Y-Asap

¹ Nanê̆ Brah Ndu jêng ueh ngăn ma phung Israel, Nây jêng phung geh nuih n'hâm kloh rsang.

² Bi ma gâp, jâng gâp bơi ma chêh prah, Hôm djê̆ lê̆ nhuat gâp bơi ma mbĭr.

³ Yorlah gâp saơ nau ndrŏng phung mhĭk Pôri gâp ji nuih ma phung sưr.

⁴ Yorlah khân păng mâu ji ôh tơlah khĭt; Săk jăn khân păng ăt lay ktang.

⁵ Khân păng mâu gŭ ôh tâm nau uh ah nâm bu phung bunuyh êng, Mâu lĕ geh nau mhĭk tât tâm ban ma bunuyh ta neh ntu.

⁶ Yor nây, nau sưr ƀư jrŏng ta trô ko khân păng; Nau tŭn jot nkŭm khân păng nâm bu kho ao.

⁷ Măt khân păng luh mpơl tâm ngi; Nuih n'hâm khân păng bêng nau mĭn brŭt moih.

⁸ Khân păng nsŭch, ngơi lĕ nau mhĭk jêh ri nkrit nhhu Khân păng ngơi bêng ma nau sưr.

⁹ Bâr mbung ngơi kek tât ta klơ trôk Bi ma mpiăt phong bunuyh ta neh ntu.

¹⁰ Yor ma nau nây phung ƀon lan Păng gŭ mpeh ma khân păng, Jêh ri khân păng nhêt suăt lĕ dak tâm kachok khân păng.

¹¹ Khân păng lah: “Mâm ƀư Brah Ndu dơi gĭt? Nơm Dŭt Prêh geh nau gĭt rbăng lĕ?”

¹² Ri, phung mhĭk geh nau đăp mpăn ƀaƀơ; Drăp ndơ khân păng lơ hao mro.

¹³ Gâp mât jêh nuih n'hâm gâp kloh rsang jêng mâu khlay ôh Jêh ri rao ti gâp tâm nau mâu mâp tih jêng dơm dam.

¹⁴ Yorlah ăp nar gâp dơn nau rêh ni, Ăp ôi bu nduyh nkra gâp.

¹⁵ Tơlah gâp lah pô aơ: “Gâp mra ngơi kơt nây” Pôri gâp ƀư tih jêh ma nau mâu răp jăp đah noi deh phung ƀon lan May.

¹⁶ Tơlah gâp mĭn rvê gay ma gĭt rbăng nau nây Ri mơ gâp saơ nuih n'hâm jâk jêr.

¹⁷ Kŏ tât gâp lăp tâm ntŭk kloh ueh Brah Ndu, Ri mơ gĭt rbăng nau nglĕ dŭt khân păng.

¹⁸ Nanê̆ May dơm khân păng ntŭk mbĭr; May ƀư ma khân păng tŭp tâm nau rai yot.

¹⁹ Ri, bu ƀư rai khân păng tâm ƀât lât, Nau klach toyh ƀư ma khân păng roh rai.

²⁰ Ơ Kôranh Brah, tâm ban bu uănh mâu khlay nau mbơi tơlah kah rngăl, Pôri May ăt nsot lơi gui rup khân păng tơlah May kah rngăl kơt nây.

²¹ Tơlah nuih n'hâm gâp rngot, Jêh ri nuih n'hâm gâp uh ah,

²² Pôri abaơ aơ gâp jêng phung rluk, mâu gĭt rbăng, Gâp tâm ban du mlâm mpa bri tanăp măt May.

²³ Ƀiălah gâp hôm gŭ ndrel ma May ƀaƀơ; May kuăn ti ma gâp.

²⁴ May mra sŏk nau ntĭm nti gay ma njŭn leo gâp, Jêh nau nây, vơt rom gâp tâm nau chrêk rmah.

²⁵ Ta klơ trôk padih May mâu hôm geh bunuyh ôh? Bi ta neh ntu gâp mâu hôm ŭch rŏng ma bu êng rlau ma May.

²⁶ Nglay săk jêh ri play nuih gâp mra roh rai, Ƀiălah Brah Ndu jêng nau ktang ma nuih n'hâm gâp; Jêh ri jêng ndơ ma gâp n'ho ro.

²⁷ Yorlah ri phung gŭ ngai đah May mra rai yot; May ƀư rai phung ƀư tih mâu răp jăp, chalơi May

²⁸ Ƀiălah ueh maak ngăn ma gâp dơi văch dăch ma Brah Ndu; Gâp săch Kôranh Brah Yêhôva ƀư ntŭk gâp gŭ krap, Gay nkoch bri lĕ rngôch kan May.