Nau Mprơ Ơm 71 - Nau Brah Ndu Ngơi 2023

Nau mbơh sơm du huê bu ranh

¹ Ơ Brah Yêhôva, gâp nde krap tâm May; Lơi ăn gâp mâp geh nau bêk prêng ôh.

² Dăn sŏk nau sŏng srăng May tâm chuai gâp jêh ri rklaih gâp; Rkêng tôr May ma gâp, jêh ri tâm rklaih gâp.

³ Dăn May ƀư lŭ toyh ăn ma gâp gŭ krap Ăn jêng ntŭk gâp dơi lăp ta nây ƀaƀơ; Dăn May ntrŭnh nau ntăm tâm rklaih gâp Yorlah May jêng lŭ toyh ngăn jêh ri pôih nâp gâp.

⁴ Ơ Brah Ndu gâp, tâm rklaih gâp bơh ti phung ƀai, Jêh ri bơh ti bunuyh kue jêh ri janh ƀai.

⁵ Yorlah, ơ Kôranh Brah jêng Brah Yêhôva, May jêng nau kâp gân Jêh ri jêng nau gâp rnơm nsing bơh hôm mom.

⁶ Gâp nsing tâm May ntơm bơh rnôk bu mhe deh ma gâp; May yơh ăn gâp du luh tă bơh ndŭl me. Gâp mra mprơ tâm rnê ma May ƀaƀơ.

⁷ Gâp jêng nau hih rhâl ma lĕ rngôch bunuyh; Ƀiălah May jêng ntŭk nâp gâp nde krap.

⁸ Mbung gâp bêng nau tâm rnê ma May, Gâp vay mât ton May ăp nar.

⁹ Lơi ta May chalơi gâp tâm rnôk lĕ ranh; Lơi ta du ngai bơh gâp tơlah nau ktang lĕ huănh hươi.

¹⁰ Yorlah phung ngơi rlăng đah gâp, Phung kâp rmiăt nau rêh gâp tâm nchră ndrăng khân păng.

¹¹ Khân păng lah: “Brah Ndu chalơi jêh păng Hăn tĭng hom jêh ri pănh păng, Yorlah mâu geh bunuyh tâm rklaih păng ôh.”

¹² Ơ Brah Ndu! Lơi gŭ ngai đah gâp ôh; Ơ Brah Ndu gâp! Văch kơl gâp gơnh oi.

¹³ Ăn phung rlăng đah gâp geh nau bêk prêng jêh ri rai yot; Ăn ma phung joi nau ƀư mhĭk ma gâp Geh nau nkŭm ma nau bu mưch jêh ri nau ƀơ̆.

¹⁴ Ƀiălah gâp mra kâp gân ƀaƀơ Jêh ri gâp mprơ tâm rnê ma May lơ hâu tâm ăp nar.

¹⁵ Bâr mbung gâp mra nkoch tay nau sŏng srăng May, Ăp nar gâp mbơh nau May tâm rklaih, Yorlah gâp mâu gĭt mâm nkoch gay ma lĕ.

¹⁶ Gâp mra văch mprơ tâm rnê lĕ nau brah Kôranh Brah Yêhôva; Gâp mra kah gĭt nau sŏng srăng May, Jêh ri knŏng kah gĭt ma nau sŏng srăng May dơm.

¹⁷ Ơ Brah Ndu, May ntĭm nti jêh gâp bơh gâp hôm mom, Kŏ tât ta nar aơ gâp ăt mbơh lĕ nau kan khlay May.

¹⁸ Ơ Brah Ndu, nđâp lah gâp lĕ ranh jêh ri sŏk ndra jêh, Lơi ta May chalơi gâp ôh Kŏ tât gâp mbơh nau dăng ktang May ma rnôk kăndơ̆, Jêh ri nau brah May ma noi deh ndơn pakơi.

¹⁹ Ơ Brah Ndu, nau sŏng srăng May Prêh tât tâm trôk. May yơh ƀư jêh lĕ nau kan dŭt toyh, Ơ Brah Ndu, mbu nơm jêng tâm ban ma May?

²⁰ May jêng Nơm hŏ ƀư jêh ma hên saơ âk nau rêh ni, hâu ngăn, May mra ƀư ăn hên dơi dâk rêh tay Jêh ri njŭn hên hao luh Bơh ntu jru tâm neh ntu.

²¹ May mra ntop nau yơk gâp, Jêh ri plơ̆ bonh leng gâp.

²² Ơ Brah Ndu gâp, gâp mra dŏng gong rêng gay mprơ tâm rnê ma May, Mât ton ma nau răp jăp May. Ơ Nơm Kloh Ueh Israel, Gâp mra dŏng gong rêng gay mprơ tâm rnê ma May.

²³ Bâr mbung mra nter hâk tơlah mprơ tâm rnê ma May, Yorlah huêng gâp May hŏ tâm chuai jêh.

²⁴ Ăp nar mpiăt gâp nkoch nau sŏng srăng May Yorlah phung joi ƀư mhĭk ma gâp Lĕ bêk jêh ri bêk prêng ngăn.