Nau Mprơ Ơm 7 - Nau Brah Ndu Ngơi 2023

Dăn Brah Yêhôva koh dŏng rklaih bơh phung mhĭk

Nau Mprơ Ơm Y-Đavit ƀư nchih gay tâm rnê Brah Yêhôva. Nau mprơ aơ nkoch tât ma du huê Benjamin amoh păng jêng Y-Kus

¹ Ơ Brah Yêhôva Brah Ndu gâp, gâp rnơm nsing tâm ntŭk May; Dăn rklaih gâp bơh lĕ rngôch phung hăn tĭng groi gâp, jêh ri sâm rklaih an gâp,

² Klach lah khân păng hêk gâp nâm bu yau mŭr hêk mpa sa, Jêh ri ƀư săk jăn gâp jêng gâl rngơl ƀiălah mâu geh ôh nơm dơi rklaih an.

³ Ơ Brah Yêhôva Brah Ndu gâp, tơlah gâp hŏ ƀư jêh nau nây, Jêh ri mbŭk ti tâm nau kue;

⁴ Tơlah gâp mplơ̆ nau mhĭk ma bunuyh gŭ đăp mpăn ndrel đah gâp Jêh ri ntŭng pit phung rlăng gâp mâu geh nau

⁵ Pôri di ma phung rlăng tĭng ban gâp, Jot rchal nau rêh gâp tâm dâng neh, Jêh ri bôr khư nau ueh gâp tâm neh muy. (Sêla)

⁶ Ơ Brah Yêhôva, dăn dâk hom jêh ri ji nuih; Dăn tâm rdâng đah nau ji nuih ma phung rlăng gâp. Kah rngăl hom jêh ri kơl gâp; May hŏ nal jêh nau phat dôih.

⁷ Ăn hom phung ƀon lan tâm rƀŭn jŭm May; Ta ntŭk prêh klơ May chiă uănh khân păng.

⁸ Brah Yêhôva phat dôih mpôl băl bunuyh. Ơ Brah Yêhôva, dăn phat dôih ma gâp tĭng nau sŏng srăng gâp Jêh ri tĭng nau kloh ta nuih n'hâm gâp.

⁹ Ơ Brah Ndu sŏng srăng, Jêng nơm sek uănh nuih n'hâm kon bunuyh, Dăn ƀư lôch nau djơh mhĭk phung ƀai Ƀiălah ƀư ăn nâp bunuyh sŏng srăng.

¹⁰ Brah Ndu jêng khêl ma gâp, Păng tâm rklaih phung geh nuih n'hâm sŏng.

¹¹ Brah Ndu jêng Kôranh phat dôih sŏng, Jêng Brah Ndu ji nuih ăp nar đah phung mhĭk.

¹² Tơlah du huê bunuyh mâu rmal ôh nau tih, pôri Brah Ndu mra tôl đao; Păng van na gŭ kâp.

¹³ Păng rơm ndrăp jêh ndơ tâm lơh ƀư rai Jêh ri ƀư chiông hăr ma ŭnh.

¹⁴ Ri phung ƀai hŏ ntreo ma nau djơh mhĭk, Păng ntreo ma nau mhĭk, Jêh ri luh ma nau mƀruh.

¹⁵ Păng kuyh trôm, kuyh ntu Ƀiălah mra prah tŭp tâm ntu hŏ kuyh jêh

¹⁶ Nau tih mhĭk păng mra nkhŭt ta klơ bôk păng. Jêh ri nau rêh ni mra tŭp ta klơ ndăr kleng păng nơm.

¹⁷ Gâp mra nsĭt lah ma Brah Yêhôva ma nau sŏng srăng Păng, Gâp mra mprơ tâm rnê ma amoh Brah Yêhôva jêng Nơm Dŭt Prêh.