Nau Mprơ Ơm 69 - Nau Brah Ndu Ngơi 2023

Dăn Kôranh Brah tâm rklaih dôl mâp nau rêh ni

Nau Mprơ Ơm Y-Đavit, ƀư nchih ma nơm gai mprơ, tĭng bâr “Kao si ueh”

¹ Ơ Brah Ndu! Dăn rklaih gâp, Yorlah dak n'hor băm jêh tât ta trô ko gâp.

² Gâp rhuh tâm bŏk jru Jêh ri glet jâng. Gâp ngâm tâm dak jru, N'hor dak hoch rdu gâp.

³ Gâp nter, kŏ rgănh, Trô ko gâp lĕ kroh, Măt gâp huănh hươi Dôl kâp Brah Ndu gâp.

⁴ Phung ji nuih ma gâp mâu geh nau Âk lơn ma sŏk ta klơ bôk gâp; Phung rlăng janh ktang mâu geh nau ŭch ƀư ƀai ma gâp; Bu đă gâp ntrok ndơ gâp mâu mâp ntŭng.

⁵ Ơ Brah Ndu! May gĭt nau rluk mâl gâp, Lĕ nau tih gâp mâu dơi pôn ma May ôh.

⁶ Ơ Kôranh Brah jêng Brah Yêhôva ma phung tahan, Ăn phung kâp gân May mâu geh nau bêk prêng yor gâp; Ơ Brah Ndu Israel! Ăn phung joi May mâu geh nau bu ƀư bêk yor gâp.

⁷ Ma yor May gâp anh nau bu suai rak Jêh ri nau bêk prêng nkŭm muh măt gâp.

⁸ Gâp jêng du huê bu êng đah phung oh nâu gâp, Jêng du huê bu năch đah phung kon bu klâu mê̆ gâp.

⁹ Yorlah nau duh nđơr ma Ngih May su lơi gâp, Nau bêk prêng phung bêk prêng May hŏ nkhŭt jêh tâm gâp.

¹⁰ Tơlah gâp nhĭm nhhiăng jêh ri ver sa gay ma nchâp huêng Pôri khân păng bêk prêng ma gâp.

¹¹ Gâp sŏk bok ƀau nsoh ƀư ao Pôri gâp jêng nau pâl gơm ma khân păng.

¹² Phung gŭ ta mpông ƀon ngơi hôr juar yor ma gâp, Jêh ri gâp jêng nau mprơ mưch rmot ma phung nhŭl ndrănh.

¹³ Ƀiălah Ơ Brah Yêhôva! Rnôk nơih aơ gâp mbơh sơm ma May. Ơ Brah Ndu! Tĭng nâm nau yô̆ nđach toyh hâu ngăn May jêh ri tĭng nau ngăn tâm rklaih tă bơh May, Dăn mplơ̆ lah nau gâp.

¹⁴ Dăn rklaih gâp bơh tâm bŏk, Lơi ăn rhuh jru tâm ntŭk nây. Ăn gâp dơi klaih bơh phung ji nuih ma gâp Jêh ri n'hor dak jru.

¹⁵ Ăn n'hor dak mâu rdu bŭk gâp, Brŏng jru mâu rvăn gâp, Ntu jru mâu nkŭm bâr tâp gâp tâm nây.

¹⁶ Ơ Brah Yêhôva! Dăn mplơ̆ lah nau gâp yor nau ueh May jêng ueh; Tĭng nâm nau yô̆ nđach rmeh ler May, dăn n'gĭl ma gâp.

¹⁷ Lơi ta May pôn măt đah phung oh mon May, Yorlah gâp mâp nau rêh ni; Dăn gơnh oi mplơ̆ lah nau gâp.

¹⁸ Dăn Kôranh Brah hăn dăch ta huêng gâp jêh ri tâm chuai gâp, Tâm rklaih gâp, yor phung rlăng gâp.

¹⁹ May gĭt nau prêng gâp, Nau bêk prêng jêh ri nau ƀơ̆ gâp; Lĕ phung rlăng ma gâp gŭ tanăp măt May da dê.

²⁰ Nuih n'hâm gâp chah rai yor bu ƀư nau prêng, Jêh ri gâp rêh ni ngăn. Gâp kâp gân nau yô̆ ƀiălah mâu saơ, Gâp joi nơm bonh leng ƀiălah mâu mâp.

²¹ Khân păng sŏk ndơ tăng ƀư jêng ndơ sa ma gâp. Jêh ri ăn gâp nhêt dak srat dôl ji hir dak.

²² Ăn sưng sông sa khân păng jêng dăk sân ma khân păng nơm; Jêh ri ndơ ƀư brah khân păng jêng jal ma mĭt jiăng khân păng.

²³ Ŭch ma măt khân păng chieh, mâu dơi saơ ôh, Jêh ri ndŭr kơi khân păng kuăt krô mro.

²⁴ Dăn nkhŭt nau May ji nuih tâm khân păng. Ăn May ji nuih tĭng ban khân păng.

²⁵ Ŭch ma ntŭk khân păng gŭ plơ̆ jêng rngol. Mâu hôm geh bunuyh gŭ tâm ngih bok khân păng đŏng ôh.

²⁶ Yorlah khân păng ƀư mhĭk jêh ma nơm May dong Jêh ri khân păng nkoch tay nau rêh ni phung May ƀư sôt rmanh jêh.

²⁷ Dăn Kôranh Brah tâm rmal nau tih dăp bun khân păng; Lơi ăn khân păng dơn geh nau sŏng srăng May.

²⁸ Jut lơi amoh khân păng bơh ndrom samƀŭt nau rêh, Jêh ri lơi ta nchih amoh khân păng ndrel ma phung sŏng srăng.

²⁹ Gâp geh nau o ach jêh ri ji ngăn; Ơ Brah Ndu! Ăn nau May tâm rklaih king n'gang gâp.

³⁰ Gâp mra mprơ tâm rnê mât ton ma amoh Brah Ndu; Sŏk nau tâm rnê lah ueh gay ma yơk mbah Păng.

³¹ Nau nây mra maak nuih n'hâm Brah Yêhôva rlau lơn mpa ƀư brah ma ndrôk nkuăng, Mâu lah du mlâm ndrôk nkuăng geh nke jêh ri nchop rnglah.

³² Phung dêh rhêt mra saơ nau nây jêh ri maak; Bi khân may jêng phung joi Brah Ndu, ăn nuih n'hâm khân may bêng ler nau rêh.

³³ Yorlah Brah Ndu iăt nau phung pưt kƀah, Jêh ri păng mâu tâm rmot ma gâp phung ƀon lan May dôl gŭ tâm ndrung.

³⁴ Ăn trôk, neh ntu, dak mƀŭt Jêh ri lĕ ntil mpa rêh tâm nây mprơ tâm rnê ma Păng da dê.

³⁵ Yorlah Brah Ndu mra tâm rklaih Siôn Jêh ri rdâk njêng tay lĕ ƀon Yuđa. Ƀon lan Păng mra gŭ ta nây jêh ri khân păng mra pit sŏk păng.

³⁶ Noi deh phung oh mon Păng mra dơn drăp nây; Jêh ri bu nơm rŏng ma amoh Păng mra gŭ ta nây.