Nau Mprơ Ơm 68 - Nau Brah Ndu Ngơi 2023

Nau mprơ dơi tâm lơh

Nau Mprơ Ơm Y-Đavit. Nau mprơ ƀư nchih ma nơm gai mprơ

¹ Dăn Brah Ndu dâk, gay ƀư ma phung rlăng Păng chah rai pru pra Jêh ri ƀư ma phung tâm rmot Păng nchuăt du panăp Păng.

² Roh rai nâm bu nhhŭk ŭnh Kôranh Brah mra ƀư ma khân păng rai lêk lơi kơt nây lĕ; Tâm ban ma mpêt lêk tâm ŭnh Pônây yơh phung ƀai mra roh rai tanăp măt Brah Ndu kơt nây lĕ.

³ Ƀiălah phung sŏng srăng mra răm maak, Hâk maak tanăp măt Brah Ndu; Ăn khân păng maak, răm rhơn.

⁴ Mprơ hom ma Brah Ndu, mprơ tâm rnê hom ma amoh Păng! Nkra hom trong ăn Nơm ncho ta klơ phung ndâr tŭk, Amoh Păng jêng Brah Yêhôva; Răm maak hom tanăp măt Păng!

⁵ Brah Ndu gŭ ntŭk kloh ueh Păng, Jêng mbơ̆ ma phung kon đơi jêh ri Nơm N'gang ma bu ur ndrô.

⁶ Brah Ndu ƀư ma phung rêh rngloi geh ngih gŭ, Njŭn phung dĭk bu tât ma nau ndrŏng kuăng, Ƀiălah ăn phung mâu gŭ răp jăp mra gŭ tâm neh sơh.

⁷ Ơ Brah Ndu, tơlah May hăn lor panăp phung ƀon lan May, Tơlah May hăn rgăn tâm bri rdah (Sêla)

⁸ Pôri neh ntu mpât n'gơ, lĕ ndâr trôk nkhŭt dak mih Tanăp măt Brah Ndu, jêng Nơm Sinai, Tanăp măt Brah Ndu, jêng Brah Ndu phung Israel.

⁹ Ơ Brah Ndu, ăn dak mih tŭp âk ta klơ drăp ndơn May; Tơlah păng sơh kro, May ăn păng sĭt n'hâm suan.

¹⁰ Ơ Brah Ndu, phung ƀon lan May joi dơi saơ du ntŭk gŭ ta nây, Yor nau ueh, May ăn lĕ nau ŭch phung pưt kƀah.

¹¹ Kôranh Brah ntrŭnh nau ntăm, Du phung bu ur hăn mbơh Nau Mhe Mhan Ueh pô aơ:

¹² “Phung hađăch geh phung tahan nchuăt du, nchuăt du jêh!” Phung bu ur hôm gŭ tâm ngih ăt tâm pă drăp ndơ geh.

¹³ Tơlah khân may gŭ rlu tâm nklang ndrung biăp, Ăt geh năr plŭk nkŭm ma prăk. Jêh ri rsau ma mah chrêk.

¹⁴ Tơlah Nơm Geh Lĕ Nau Brah lơh nchah rai phung hađăch, Njêng mih pler nkhŭt ta yôk Salmôn.

¹⁵ Hơi yôk Basan jêng yôk Brah Ndu, Yôk geh âk n'gơn yôk dŭt prêh klơ!

¹⁶ Ơ lĕ yôk geh âk ntŭk dŭt prêh klơ, mâm ƀư khân may uănh tâm rmot Yôk Brah Ndu săch jêh ƀư ntŭk Păng gŭ? Nanê̆, Brah Yêhôva mra gŭ ta nây n'ho ro.

¹⁷ Ndeh Brah Ndu âk rbăn, âk rmưn, mâu dơi kơp; Kôranh Brah gŭ tâm nklang lĕ ndeh nây, Bơh yôk Sinai chuat lăp tâm ntŭk kloh ueh.

¹⁸ Păng hao jêh ntŭk yôk prêh, Njŭn leo âk ngăn phung bu nă, Păng dơn ndơ nhhơr tă bơh kon bunuyh, Nđâp ma phung tâm rdâng, Brah Yêhôva gŭ ndrel ma khân păng.

¹⁹ Mât ton ma Kôranh Brah Jêng Nơm mbăk an ndơ jâk he ăp nar, Nây jêng Brah Ndu jêng nau tâm rklaih hên. (Sêla)

²⁰ Brah Ndu jêng Brah Ndu tâm rklaih hên, Yor nau rnơm ma Kôranh Brah Yêhôva yơh kon bunuyh klaih khĭt.

²¹ Ƀiălah Brah Ndu mra jot ăn nchah bôk phung rlăng đah Păng, Jêh ri bôk sŏk phung hôm tĭng tâm nau tih mhĭk.

²² Kôranh Brah lah jêh: “Tă bơh Basan Gâp mra njŭn phung ƀon lan Gâp sĭt, Djôt khân păng hao bơh dak rlai jru.

²³ Gay jâng khân may jot tâm mham phung rlăng Jêh ri mpiăt lĕ so khân may ăt ler mham phung rlăng gay geh ndơ sa.”

²⁴ Ơ Brah Ndu jêng Hađăch may, lĕ rngôch bunuyh hŏ saơ jêh phung hăn tâm groi ndrel vơt May, Du phung hăn tâm groi ndrel hăn lăp tâm ntŭk kloh ueh.

²⁵ Phung mprơ hăn lor, phung kreh gong rêng tĭng groi kơi, Tâm nklang jêng phung bu ur dong gâr jê̆ goh gâr.

²⁶ “Mât ton tâm rnê hom ma Brah Ndu tâm phung nau tâm rƀŭn, Mât ton hom ma Brah Yêhôva, hơi phung kon sau Israel,”

²⁷ Ri ndŭl mpôl Benjamin jê̆ lơn, hăn panăp, Tĭng pakơi jêng phung kon chiă uănh Yuđa jêh ri ndŭl mpôl khân păng; Rĭ mơ tât phung chiă uănh Sabulôn jêh ri phung chiă uănh Naptali.

²⁸ Brah Ndu ah, ăn n'hâm toyh suan dăng May; Ơ Brah Ndu, dăn mpơl nau brah May, nâm bu May hŏ ƀư jêh ma hên.

²⁹ Tă bơh ngih Brah May ta ƀon Yêrusalem, Phung hađăch mra njŭn leo mpa nhhơr ma May.

³⁰ Nduyh lah ma mpa bri rêh gŭ tâm rpho treng, Nduyh lah ma phung ndrôk nkuăng ndrel lĕ ndrôk kon phung ƀon lan Kŏ tât khân păng chon kômâk jêh ri nhhơr lĕ rlay prăk. Dăn May ƀư rai lơi phung mpôl băl bunuyh ŭch ma nau tâm lơh.

³¹ Ndơ nhhơr ma hađăch mra djôt tă bơh Êjipt, Phung Êthiôpi mra gơnh yơr ti mpeh ma Brah Ndu.

³² Ơ lĕ ƀon bri hađăch ta neh ntu, mprơ tâm rnê hom ma Brah Ndu! Mprơ hom, tâm rnê ma Kôranh Brah kloh ueh! (Sêla)

³³ Păng jêng Nơm ncho ta klơ ma lĕ ndâr trôk ntơm bơh saơm, Iăt hom bâr Păng nter huy.

³⁴ Mbơh hom nau brah ma Brah Ndu, Nau rnam Păng tâm phung Israel Jêh ri nau ktang Păng tâm trôk.

³⁵ Ơ Brah Ndu, May khư ma nau klach tâm ntŭk kloh ueh May; Brah Ndu phung Israel Ăn nau ktang jêh ri nau brah ma phung ƀon lan Păng. Mât ton ma Brah Ndu!