Nau Mprơ Ơm 67 - Nau Brah Ndu Ngơi 2023

Nơm nchih nkah nti lĕ bri dak mprơ tâm rnê hom ma Brah Ndu

Nau Mprơ Ơm. Nau mprơ nti ƀư nchih ma nơm gai mprơ, dŏng ndrel gong rêng rse

¹ Ăn Brah Ndu yô̆ nđach ma hên jêh ri ăn nau ueh lăng ma hên, Nau nchrat ang muh măt Păng sol tâm hên. (Sêla)

² Gay trong May dơi gĭt tâm neh ntu Nau May tâm rklaih dơi gĭt ta nklang lĕ bri dak.

³ Ơ Brah Ndu, ăn phung ƀon lan tâm rnê ma May! Lĕ rngôch bunuyh tâm rnê ma May!

⁴ Ăn lĕ rngôch bunuyh răm maak jêh ri hâk maak mprơ tâm rnê, Yorlah May mra phat dôih lĕ mpôl băl bunuyh ma nau sŏng Jêh ri njŭn leo lĕ bunuyh tâm neh ntu. (Sêla)

⁵ Ơ Brah Ndu, ăn phung ƀon lan tâm rnê ma May! Lĕ rngôch bunuyh tâm rnê ma May.

⁶ Neh ntu hon geh kao play, Brah Ndu jêng Brah Ndu phung he mra ăn nau ueh lăng ma he.

⁷ Brah Ndu mra ăn nau ueh lăng ma hên Jêh ri lĕ bunuyh gŭ lam rplay neh mra klach yơk ma Păng da dê.