Nau Mprơ Ơm 66 - Nau Brah Ndu Ngơi 2023

Mprơ tâm rnê nau kan Brah Ndu dŭt toyh

Nau Mprơ Ơm. Nau mprơ ƀư nchih ma nơm gai mprơ

¹ Ơ lĕ neh ntu, Sŏk hom bâr troh maak ma Brah Ndu.

² Mprơ tâm rnê hom nau chrêk rmah Păng, Mprơ tâm rnê jêh ri mât ton Păng.

³ Lah hom ma Brah Ndu pô aơ: “Lĕ nau kan May toyh ngăn ngên! Yorlah nau Brah May dŭt toyh, lĕ phung rlăng May mra tâm rnglăp ma May da dê.

⁴ Lĕ neh ntu mra yơk mbah ma May; Khân păng mprơ tâm rnê ma May, Khân păng mprơ tâm rnê ma amoh May.” (Sêla)

⁵ Văch hom n'gơr uănh nau kan Brah Ndu: Nau kan Păng ƀư ma kon bunuyh jêng khư klach ngăn.

⁶ Păng tâm rgâl dak rlai jêng neh sơh; Bu hăn jâng rgăn dak krong, Ta ntŭk nây hên răm maak tâm May.

⁷ Păng dŏng nau brah Păng gay ma chiă uănh n'ho ro; Măt Păng sek uănh lĕ bri dak; Phung rlăng lơi ta n'hao êng khân păng. (Sêla)

⁸ Ơ phung bunuyh ƀon lan, tâm rnê hom ma Brah Ndu he! Ƀư hom ăn bâr nau tâm rnê Păng nteh huy tâm lam ntŭk.

⁹ Păng yơh mât mơh njrăng nau rêh he, Mâu ăn jâng he mbĭr prah.

¹⁰ Yorlah Brah Ndu ah, May rlong uănh jêh hên, May krĕt hên tâm ban ma krĕt prăk.

¹¹ May ăn hên geh tâm dăk nhuăl, Dăp anh jâk ta klơ ndŭr kơi hên.

¹² May ăn bu ncho ta klơ bôk hên; Hên hăn rgăn ŭnh, rgăn dak, Ƀiălah May njŭn leo hên ta ntŭk ndrŏng ngăn.

¹³ Gâp mra djôt ndơ ƀư brah gŭch lăp tâm ngih May, Ƀư lĕ nau gâp ton jêh ma May,

¹⁴ Jêng nau bâr mbung gâp hŏ ngơi jêh Jêh ri bâr mbung gâp hŏ ton jêh dôl mâp nau rêh ni.

¹⁵ Gâp mra nhhơr ma May lĕ biăp lay ueh jêng mpa ƀư brah gŭch Ma ngi biăp nkuăng. Gâp mra nhhơr lĕ ndrôk nkuăng jêh ri be nkuăng. (Sêla)

¹⁶ Ơ lĕ rngôch phung klach yơk mbah ma Brah Ndu, văch iăt hom, Gâp mra nkoch nau Păng ƀư jêh ma huêng gâp.

¹⁷ Bâr mbung gâp kuăl dăn ma Păng Jêh ri mpiăt gâp tâm rnê ma Păng.

¹⁸ Tơlah nuih n'hâm gâp n'gĭl uănh nau mĭn mhĭk Kôranh Brah mâu mra iăt nau gâp ôh.

¹⁹ Ƀiălah nanê̆ Brah Ndu hŏ tăng jêh; Păng rkêng jêh tôr iăt nau gâp mbơh sơm.

²⁰ Mât ton tâm rnê ma Brah Ndu. Yorlah Păng mâu dun ôh nau gâp kuăl mbơh sơm Mâu lĕ sŏk lơi nau ueh Păng bơh gâp.