Nau Mprơ Ơm 65 - Nau Brah Ndu Ngơi 2023

Tâm rnê lah ueh Brah Ndu ăn nau yô̆ rmeh ler

Nau Mprơ Ơm Y-Đavit. Nau mprơ ƀư nchih ma nơm gai mprơ.

¹ Ơ Brah Ndu, Ta ƀon Siôn, khư nau mprơ tâm rnê ma May Jêh ri djôt prăp nau ton jêh ma May.

² Ơ Kôranh Brah jêng Nơm gŭ iăt nau mbơh sơm! Lĕ rngôch nglay săk mra văch ta May da dê.

³ Nđâp tơlah nau djơh mhĭk dơi lơn ma gâp, Ƀiălah May yô̆ an nau tih hên.

⁴ Ueh uĭn ngăn ma nơm May dơi săch Jêh ri dơi vay tât gŭ tâm nkual ngih May. Hên mra geh nau hơm mpay ma lĕ nau ueh tâm ngih May, Jêng ngih brah kloh ueh May.

⁵ Ơ Brah Ndu jêng Nơm tâm rklaih hên, May mplơ̆ lah ma hên ma lĕ nau sŏng srăng, khư ma nau klach. May jêng nau kâp gân ma phung nglĕ dŭt rplay neh Phung gŭ ngai tâm dak mƀŭt tâm ban lĕ.

⁶ May dŏng nau brah gay rdâk njêng ma phung yôk. May rêt rse bŭt ma nau ktang.

⁷ May buay dak rlai ngrông huy, Mpiăt dak khuh lŭng nter; Păng buay nau uh ah mpôl băl bunuyh.

⁸ Phung gŭ ta ntŭk nglĕ dŭt rplay neh saơ nau mbên khlay May geh nau klach da dê; May ƀư ơm ôi jêh ri kêng mhaơ geh nau răm maak.

⁹ May chop khâl neh ntu jêh ri djrah păng, Ƀư ma păng geh neh ueh; Ăn n'hor dak Brah Ndu bêng ma dak. Păng rơm ndrăp neh ntu Gay ăn ba răch ma kon bunuyh.

¹⁰ May djrah dak ta mbor kai, May ƀư lâng lĕ glo neh. Ăn âk dak mih ƀư ma rdơ̆ neh, Jêh ri ăn nau ueh uĭn ma drăp ndơ.

¹¹ May sŏk nau ueh ƀư đon hađăch ndô ma năm khay; Lĕ nhuat May hăn rgăn ƀư ma neh jêng ueh.

¹² Ƀư ma ndrêch gơ̆ tâm bri rdah ntop ndrêh ueh Jêh ri dor yôk hâk răm troh maak.

¹³ Ndrêch gơ̆ bêng ma phung biăp, Lĕ rlŭng nkŭm ma ba răch; Lam ntŭk mprơ troh maak.