Nau Mprơ Ơm 64 - Nau Brah Ndu Ngơi 2023

Nơm nchih mbơh sơm ma Kôranh Brah tâm rklaih bơh phung rlăng

Nau Mprơ Ơm Y-Đavit, ƀư nchih ma nơm gai mprơ

¹ Ơ Brah Ndu, gŭ iăt bâr gâp nter vơh vơl, King n'gang nau rêh gâp bơh nau phung rlăng nkrit nhhu.

² May pôn gâp bơh nau tâm nchră phung ƀai, Bơh ma phung ƀư mhĭk.

³ Khân păng tôl mpiăt khân păng nơm nâm bu đao. Bruh nau kăch mhĭk ji tâm ban ma lĕ chiông hăr.

⁴ Khân păng gŭ kâp dâp gay ma pănh bunuyh sŏng; Ƀât lât khân păng pănh hăr mâu du jê̆ nau klach ôh.

⁵ Khân păng ŭch ƀư nau mhĭk, Khân păng nchră mĭn sân dăk tâm ntŭk ndâp ƀư mhĭk bunuyh. Khân păng lah pô aơ: “Mbu nơm mra dơi saơ?”

⁶ Khân păng nchră mĭn lĕ nau mhĭk jêh ri lah: “He ƀư lôch jêh nau ŭch ƀư dŭt ueh.” Nau mĭn jêh ri nuih n'hâm ăp nơm jêng mhĭk ngăn.

⁷ Ƀiălah Brah Ndu mra pănh hăr ma khân păng: Ƀât lât khân păng mra geh sôt rmanh.

⁸ Pônây khân păng mra chêh prah, mpiăt khân păng tâm rdâng đah khân păng nơm; Ăp nơm saơ khân păng mra rteh bôk da dê.

⁹ Lĕ rngôch bunuyh mra klach da dê, Khân păng mra mbơh nau kan Brah Ndu. Jêh ri gĭt rbăng rah vah nau păng ƀư jêh.

¹⁰ Nơm sŏng srăng mra răm maak tâm Brah Yêhôva Jêh ri nde krap tâm Păng. Jêh ri lĕ rngôch phung geh nuih n'hâm sŏng mra bêng ma nau hâk răm.