Nau Mprơ Ơm 63 - Nau Brah Ndu Ngơi 2023

Huêng ji hir tâm Kôranh Brah dơi geh nau mpay

Nau Mprơ Ơm Y-Đavit, ƀư nchih tơlah păng dôl gŭ tâm bri rdah Yuđa

¹ Ơ Brah Ndu, May jêng Brah Ndu gâp, Gâp joi May ma lĕ nuih n'hâm Tâm ban ma ntŭk neh sơh, đang, mâu geh dak. Huêng gâp ji hir ma May, Săk jăn gâp ŭch rŏng May.

² Ăn gâp gŭ uănh May tâm ngih kloh ueh. Gay uănh nau brah jêh ri nau chrêk rmah May.

³ Yor nau ueh May ueh lơn ma nau rêh. Bâr mbung gâp mra mprơ tâm rnê ma May.

⁴ Pôri gâp mra tâm rnê lah ueh ma May lĕ nau rêh gâp; Tâm amoh May, gâp mra yơr ti.

⁵ Huêng gâp dơi hơm tâm ban ma sa glo tâm nting jêh ri ngi; Bâr mbung gâp mra răm maak jêh ri mprơ tâm rnê ma May.

⁶ Dôl gŭ bê̆ch ta klơ sưng, gâp kah gĭt ma May, Jêh ri gŭ mĭn rvê ma May tâm ăp măng.

⁷ Yorlah May kơl gâp jêh, Jêh ri gâp mprơ maak tâm dâng gui năr May.

⁸ Huêng gâp kuăn nâp tâm May; Ti ma May kuăn rdâng gâp.

⁹ Phung joi ŭch ƀư mhĭk ma nau rêh gâp Mra tŭp tâm ntu jru neh ntu.

¹⁰ Bu mra jao khân păng ma nau ktang mlâm đao, Ƀư jêng mpa ma so bri sa.

¹¹ Ƀiălah hađăch mra hâk răm tâm Brah Ndu; Lĕ rngôch phung tâm amoh May ma nau ton săk mra geh nau yơk da dê. Bi ma mbung phung mƀruh mra mêm lơi.