Nau Mprơ Ơm 62 - Nau Brah Ndu Ngơi 2023

Brah Ndu king n'gang bunuyh rnơm nsing ma Păng

Nau Mprơ Ơm Y-Đavit, ƀư nchih ma nơm gai mprơ, tĭng bâr “Jêduthun”

¹ Huêng gâp gŭ rlu mpăn ntŭk du huê Brah Ndu; Nau tâm rklaih gâp văch tă bơh Păng.

² Knŏng du huê Păng jêng lŭ toyh jêh ri nau tâm rklaih gâp; Jêng ntŭk gâp gŭ krap tâm ban lĕ; gâp mâu mra geh nau mpât n'gơ ôh.

³ Ndah jŏ khân may hăn lơh ma du huê bunuyh? Lĕ rngôch khân păng tâm rgum gay ma lơh rlâm bu Nâm bu mpir ngih nkêng, tâm ban pêr bơi ma cha lôt lĕ?

⁴ Khân păng knŏng tâm nchră gay ma ƀư rlâm lơi păng bơh ntŭk bu yơk. Khân păng rŏng ma nau mƀruh, Bâr mbung ăn nau ueh uĭn Ƀiălah tâm nuih n'hâm khân păng rak rtăp. (Sêla)

⁵ Ơ huêng gâp, gŭ rlu hom tâm Brah Ndu. Yorlah nau gâp kâp gân dơm tâm păng.

⁶ Knŏng du huê Păng yơh jêng lŭ toyh gâp jêh ri nau tâm rklaih gâp, Jêng ntŭk gâp nde krap; gâp mâu mra geh nau mpât n'gơ ôh.

⁷ Nau tâm rklaih jêh ri nau chrêk rmah gâp gŭ tâm Brah Ndu; Păng jêng lŭ toyh ma gâp, ntŭk gâp gŭ krap.

⁸ Hơi phung ƀon lan, rnơm nsing hom ma Păng ƀaƀơ; Nkhŭt hom lĕ nuih n'hâm tanăp măt Păng; Yorlah Brah Ndu jêng ntŭk he nde krap. (Sêla)

⁹ Nanê̆ phung bu mâu yơk knŏng jêng nsôr n'hâm dơm, Phung bu yơk knŏng nau dơm dam; Djôt dơm ta klơ njing, khân păng n'gơch tâm ban rsau. Lĕ rngôch n'gơch lơn tâm ban ma n'hâm.

¹⁰ Lơi ta rnơm ma nau tŭn jot, Mâu kâp gân ma nau dơm dam tâm nau ntŭng; Tơlah drăp ndơ ntop âk, lơi ăn nuih n'hâm khân may rnơm ta nây ôh.

¹¹ Brah Ndu hŏ lah jêh du tơ̆, Gâp hŏ tăng jêh nau aơ bar tơ̆, Pô aơ nau brah jêng ndơ Brah Ndu.

¹² Ơ Kôranh Brah, nau ueh jêng ndơ May, Yorlah May mplơ̆ lơi ma ăp nơm Tĭng nâm nau kan khân păng ƀư.