Nau Mprơ Ơm 60 - Nau Brah Ndu Ngơi 2023

Nơm nchih vah vơl yorlah mâu dơi đah nau tâm lơh jêh ri dăn Kôranh Brah kơl

Nau Mprơ Ơm Y-Đavit, ƀư nchih gay ntĭm nti, tơlah păng tâm lơh đah phung Aram gŭ ta Naharaim jêh ri đah phung Aram gŭ ta Sôba jêh ri tơlah Y-Jôap plơ̆ tay tâm lơh đah du rmưn bar rbăn nuyh phung Êđôm tâm Rlŭng Boh. Ma nơm gai mprơ, tĭng bâr “Kao si ueh nau tâm rnglăp”

¹ Ơ Brah Ndu! May chalơi jêh hên, May ăn hên jêng du pru pra; May nuih jêh ma hên. Ƀiălah aƀaơ njŭn leo hên plơ̆ tay.

² May ăn neh ntu mpât n'găr, ƀư ma păng jêng đang; Aƀaơ, ăn May nkra tay lĕ ntŭk đang yor păng n'gơ.

³ May ăn ma phung ƀon May dơn nau rêh ni, Ăn ma hên nhêt du ntil ndrănh nhŭl ji bôk.

⁴ May ăn ma phung klach yơk ma May du mlâm n'ha kơ Gay ma bu tâm mpơl păng yor nau ngăn. (Sêla)

⁵ Gay ma nơm May rŏng dơi geh nau tâm rklaih. Dăn May mplơ̆ lah nau hên dăn jêh ri sŏk ti ma May tâm rklaih hên.

⁶ Bơh ntŭk kloh ueh, Brah Ndu hŏ lah jêh pô aơ: “Gâp mra răm maak tâm pă Sichem Jêh ri veh rlŭng Sukôt.

⁷ Gilêat jêng ndơ Gâp, Manasê tâm ban lĕ; Êphraim jêng pôih nâp ma bôk Gâp; Yuđa jêng mâng jra hađăch Gâp.

⁸ Môap jêng ngan grưng Gâp rao; Gâp klŭp ntâu jot Gâp ta klơ phung Êđôm. Gâp mra nter răm maak ma nau dơi đah phung Philistin.”

⁹ Mbu nơm mra njŭn gâp lăp tâm ƀon ktang? Mbu nơm mra njŭn gâp tât ta bri Êđôm?

¹⁰ Ơ Brah Ndu, mâu di hĕ May chalơi jêh hên? Ơ Brah Ndu, May mâu hôm hăn tâm lơh ndrel ma phung tahan hên đŏng hĕ?

¹¹ Dăn May sâm kơl hên bơh nau uh ah, Yorlah kon bunuyh kơl an jêng dơm dam.

¹² Rnơm Brah Ndu, phung kon mra dơi đah tâm lơh toyh; Yorlah Păng yơh mra jot plên phung rlăng đah hên.