Nau Mprơ Ơm 59 - Nau Brah Ndu Ngơi 2023

Dăn Kôranh Brah tâm rklaih bơh phung rlăng

Nau Mprơ Ơm Y-Đavit. Ƀư nchih tơlah Y-Sôl mprơh nơm gak njrăng ngih Y-Đavit gay nkhĭt păng. Ma nơm gai mprơ, “Lơi ta ƀư rai”

¹ Ơ Brah Ndu gâp! Tâm rklaih gâp bơh phung rlăng, Jêh ri king n'gang gâp bơh phung hao tâm rdâng đah gâp.

² Tâm rklaih gâp bơh phung ƀư mhĭk, Jêh ri bơh phung ji hir mham.

³ Yorlah khân păng dôl gŭ kâp gay ƀư rai nau rêh gâp; Ơ Brah Yêhôva! Phung janh ƀai tâm rgum gay tâm rdâng đah gâp Nđâp tơlah gâp mâu tâm rdâng mâu lĕ du ntil ƀư tih.

⁴ Khân păng nchuăt văch tâm lơh nđâp lah gâp mâu geh nau tih. Dăn May kah rngăl hom gay kơl gâp jêh ri uănh ntreng gâp.

⁵ Ơ Brah Ndu ma phung tahan, jêng Brah Ndu phung Israel. Dâk hom gay tâm rmal lĕ bri dak; Lơi ta yô̆ nđach ma phung ƀư mhĭk, mâu gŭ răp jăp. (Sêla)

⁶ Kêng mhaơ khân păng plơ̆ sĭt Mblu tâm ban ma so. Jêh ri hăn ndăch jŭm ƀon.

⁷ Ri mbung khân păng hok luh nau suai rak; Mbung khân păng tâm ban ma du mlâm đao. Yorlah khân păng lah êng: “Mâu geh bu tăng ôh?”

⁸ Ƀiălah ơ Brah Yêhôva! May mra gơm ma khân păng Jêh ri mưch rmot ma lĕ bri dak.

⁹ Brah Ndu jêng nau ktang gâp, gâp mra rnơm tâm May. May yơh jêng ntŭk gâp nde krap.

¹⁰ Brah Ndu mra sŏk nau ueh Păng gay ma vơt rom gâp; Brah Ndu mra ăn gâp saơ bu plơng ma phung rlăng gâp.

¹¹ Ơ Kôranh Brah, jêng khêl ma hên! Lơi ta nkhĭt ro ma khân păng, klach lah phung ƀon lan May gơnh chuêl nau May yô̆; Sŏk hom nau brah May ƀư ma khân păng du pru pra Jêh ri ƀư rai khân păng.

¹² Yor nau tih bơh mbung khân păng, Jêng nau rak rtăp jêh ri nau ngơi mƀruh luh bơh bâr mbung khân păng ngơi, Ăn khân păng geh dăk tâm nau sưr khân păng nơm!

¹³ Dăn May ji nuih jêh ri ƀư rai khân păng, Ƀư rai lĕ hom khân păng. Ăn ma khân păng gĭt Brah Ndu yơh chiă uănh tâm Yakôb, Tât ta nglĕ dŭt rplay neh. (Sêla)

¹⁴ Kêng mhaơ khân păng plơ̆ sĭt, Mblu tâm ban ma so. Jêh ri hăn ndăch jŭm ƀon.

¹⁵ Khân păng nsong ta aơ ta ri gay joi sa; Tơlah ê hŏ hơm jêh ri khân păng mra gŭ măng ta nây.

¹⁶ Ƀiălah gâp mra mprơ ma nau ktang May; Ơm ôi gâp mra mprơ huy ma nau ueh May Yorlah May jêng pôih gâp, Ntŭk gŭ krap tâm nôk rêh ni.

¹⁷ Ơ Kôranh Brah jêng nau ktang gâp, gâp mra mprơ tâm rnê Păng; Yorlah Brah Ndu jêng ntŭk gâp nde krap, Nây jêng Brah Ndu bêng ma nuih n'hâm ueh ma kon.