Nau Mprơ Ơm 58 - Nau Brah Ndu Ngơi 2023

Mbơh sơm dăn Brah Ndu rmal phung mhĭk

Nau Mprơ Ơm Y-Đavit, ƀư nchih ma nơm gai mprơ. Tĭng bâr “Lơi ƀư rai ôh”

¹ Hơi lĕ bu klâu kon bunuyh, di lĕ khân may ngơi nau sŏng srăng hĕ? Khân may phat dôih ma nau sŏng lĕ?

² Mâu, nuih n'hâm khân may nchră mĭn nau djơh mhĭk, Ti khân may ƀư mhĭk djơh tâm n'gor.

³ Phung mhĭk vĭ nhhơt tă bơh ndŭl me khân păng. Ntơm bơh nar bu deh ƀư tih jêh, mƀruh nchơt.

⁴ Khân păng geh dak kăch tâm ban ma dak kăch bêh; Khân păng jêng tâm ban ma bêh ku ƀư tê̆k nsêt lơi tôr.

⁵ Păng mâu iăt ôh nau nơm phung n'hŭm ngơi Nđâp tơlah bunuyh blau ndơm bêh kđôi lĕ.

⁶ Ơ Yêhôva, nkê̆ch lơi sêk tâm mbung khân păng; Ơ Brah Yêhôva, nkê̆ch lơi neng phung kon yau mŭr.

⁷ Ăn khân păng jêng roh rai nâm bu dak hoch! Tơlah khân păng van na, ăn hăr khân păng lĕ ƀâl jêh!

⁸ Ăn khân păng tâm ban ma klo lưn rai lêk. Tâm ban du huê bu ur ntreo lât lơi, mâu mâp saơ ang nar!

⁹ Tâm ban bu su lok tâm ŭnh năk kơt nây lĕ Jêh ri Păng mra ăn sial phŭt khôm lơi khân păng, nđâp lah khân păng hôm ndrêh mâu lah lĕ ŭnh sa.

¹⁰ Bunuyh sŏng srăng mra maak tơlah saơ nau plơng bôk; Khân păng mra rao jâng tâm mham phung mhĭk.

¹¹ Bu mra lah pô aơ: “Nanê̆ geh nau nkhôm ma nơm sŏng srăng, Nanê̆ ngăn, Brah Ndu dôl phat dôih tâm neh ntu.”