Nau Mprơ Ơm 57 - Nau Brah Ndu Ngơi 2023

Mbơh sơm dăn Kôranh Brah tâm rklaih bơh phung ƀư mhĭk

Nau Mprơ Ơm Y-Đavit, ƀư nchih dôl păng nchuăt du tâm trôm lŭ bơh Y-Sôl. Nchih ma nơm gai mprơ, tĭng bâr “Lơi ta ƀư rai”

¹ Ơ Brah Ndu! Yô̆ nđach ma gâp, yô̆ nđach ma gâp, Yorlah huêng gâp nde krap tâm May! Di yơh, gâp nde krap tâm dâng gui năr May Kŏ tât nau mhĭk rlau lôch.

² Gâp kuăl vơh vơl ma Brah Ndu Dŭt Prêh, Nây jêng Brah Ndu ƀư lôch jêh nau ŭch Păng ma gâp.

³ Păng ăn nau tâm rklaih ma gâp tă bơh trôk. Ăn ma phung tŭn jot mra geh nau bêk prêng, nau ƀơ̆ ƀơch. (Sêla) Brah Ndu ăn nau ueh jêh ri nau răp jăp Păng ma gâp.

⁴ Huêng gâp gŭ tâm nklang phung yau mŭr; Bê̆ch tâm nklang phung mpa bri sa puăch nuyh. Geh sêk tâm ban ma chiông tak, hăr Jêh ri mpiăt khân păng hơr tâm ban ma du mlâm đao.

⁵ Ơ Brah Ndu, ăn May geh nau yơk prêh lĕ ndâr trôk; Ăn nau chrêk rmah May geh nau ang lam tâm neh ntu!

⁶ Khân păng nthăng nhuăl tâm dâng jâng gâp, Huêng gâp mpât n'gơ. Khân păng kuyh ntu jru tanăp gâp Ƀiălah khân păng nơm tŭp ta nây. (Sêla)

⁷ Ơ Brah Ndu, nuih n'hâm gâp nâp, Nuih n'hâm gâp nâp; Gâp mra mprơ jêh ri ma bâr mprơ tâm rnê.

⁸ Ơ huêng gâp, kah rngăl hom! Ơ gong rêng loih, gong rêng, ăn dâk hom! Gâp nơm mra kah rngăl ơm ôi.

⁹ Ơ Kôranh Brah, gâp mra tâm rnê lah ueh ma May tâm nklang phung ƀon lan, Mprơ tâm rnê May tâm lĕ bri dak.

¹⁰ Yorlah nau ueh Kôranh Brah prêh tât ta klơ trôk, Nau răp jăp May prêh tât ta ndâr tŭk.

¹¹ Ơ Brah Ndu, ăn May geh nau yơk prêh lĕ ndâr trôk. Ăn nau chrêk rmah May geh nau ang lam tâm neh ntu!