Nau Mprơ Ơm 56 - Nau Brah Ndu Ngơi 2023

Mbơh sơm dăn Kôranh Brah tâm rklaih jêh ri tâm rnê lah ueh ma Păng

Nau Mprơ Ơm Y-Đavit, ƀư nchih tơlah phung Philistin nhŭp păng tâm ƀon Gat. Ăn ma nơm gai mprơ, tĭng bâr “Sĭm plŭk ngai n'gor”

¹ Ơ Brah Ndu! Dăn yô̆ nđach ma gâp Yorlah bu ŭch sa rvăn nglay săk gâp; Ăp nar khân păng tâm lơh đah gâp jêh ri tŭn jot gâp.

² Phung rlăng ŭch sa rvăn nglay săk rêh gâp tâm ăp nar. Ơ Nơm Dŭt Prêh Klơ, phung tâm lơh đah gâp âk ir!

³ Tâm nar klach krit, Gâp mra dơm lĕ nau rnơm tâm May.

⁴ Kon rnơm ma Brah Ndu mprơ tâm rnê ma nau Păng ngơi; Gâp dơm lĕ nau rnơm tâm Brah Ndu yor nây mâu hôm klach ôh. Bunuyh tâm nglay săk, moh ndơ dơi ƀư ma gâp?

⁵ Ăp nar khân păng ngơi ƀrôk lĕ nau gâp ngơi, Khân păng ŭch nchră mĭn ƀaƀơ gay ƀư mhĭk ma gâp.

⁶ Khân păng tâm rƀŭn, gŭ kâp, Tĭng sek uănh ăp nhuat jâng gâp. Yorlah khân păng ŭch ƀư mhĭk nau rêh gâp.

⁷ Khân păng djơh mhĭk nâm bu pônây dơi rklaih bơh nau tâm rmal lĕ? Ơ Brah Ndu, ăn hao nuih n'glưh lơi lĕ rngôch ƀon lan.

⁸ May kơp ăp nhuat gâp hăn nsong: Dăn May dơ dak măt gâp tâm kachok May. Dak măt gâp mâu dơi nchih tâm ndrom samƀŭt May hĕ?

⁹ Tâm nar gâp kuăl dăn, Phung rlăng đah gâp mra rŭch du; Gâp gĭt nau nây yor Brah Ndu koh dŏng gâp.

¹⁰ Gâp rnơm nsing ma Brah Ndu jêh ri mprơ tâm rnê nau Păng ngơi; Gâp rnơm nsing ma Brah Yêhôva jêh ri mprơ tâm rnê nau Păng ngơi.

¹¹ Gâp dơm lĕ nau rnơm tâm Brah Ndu, yor nây mâu klach ôh; Kon bunuyh nglay săk moh ndơ mra dơi ƀư ma gâp?

¹² Ơ Brah Ndu, gâp mra ƀư lĕ nau gâp ton đah May; Gâp mra nhhơr ndơ ƀư brah tâm rnê lah ueh ma May.

¹³ Yorlah May tâm rklaih jêh gâp bơh khĭt, Jêh ri kuăn jâng gâp bơh chêh prah, Gay ma gâp hăn tanăp măt Brah Ndu Tâm nau ang ma nau rêh.