Nau Mprơ Ơm 55 - Nau Brah Ndu Ngơi 2023

Mbơh sơm dăn Kôranh Brah ƀư rai phung mƀruh ndơm

Nau mprơ nti Y-Đavit, ƀư nchih ma nơm gai mprơ, ma gong rêng rse.

¹ Ơ Brah Ndu, dăn iăt nau gâp mbơh sơm, Lơi ta pôn ôh măt tanăp nau gâp kuăl dăn.

² Iăt nau gâp jêh ri plơ̆ lah đŏng; Gâp rŭng răng, lŭng nter jêh ri vĭ nau mĭn.

³ Yor bâr troh dah phung rlăng Jêh ri nau tŭn jot phung ƀai. Yorlah khân păng djôt nau mhĭk tât ma gâp, Jêh ri tĭng nhŭp gâp ma nau nuih janh.

⁴ Nuih n'hâm gâp ji dŭt n'hâm ngăn, Nau klach krit ma nau khĭt nhŭp jêh gâp.

⁵ Nau klach jêh ri nau râm nsâr tât ƀư ma gâp, Nau ndrŏt hŏ nkŭm jêh gâp.

⁶ Gâp lah: “Ơ! Ŭch ma gâp geh kôp năr tâm ban ma plŭk, Nanê̆ gâp mra mpăr du gay ma gŭ đăp mpăn!

⁷ Di ngăn, gâp mra du ngai Jêh ri gŭ tâm bri rdah. (Sêla)

⁸ Gâp mra ndil ndal joi ntŭk nde krap Du ngai klach sial ktang, sial vănh blông.”

⁹ Ơ Kôranh Brah, rvăn lơi khân păng, ƀư tâm rlŭk nau ngơi khân păng, Yorlah gâp saơ nau ktang jêh ri tâm djrel tâm ƀon.

¹⁰ Măng jêh ri nar khân păng hăn nsong jŭm ta mpêr ƀon; Nau tih mhĭk jêh ri nau uh ah gŭ tâm ƀon toyh.

¹¹ Nau ƀư rai dôl gŭ tâm nklang ƀon tâm ban lĕ; Nau tŭn jot jêh ri nau ndơm nsong jŭm lam trong sâng.

¹² Tơlah phung rlăng ƀư bêk gâp, Gâp dơi dơn yơh; Tơlah nơm tâm rmot gâp, sưr tâm rdâng ma gâp, Gâp mra dơi du krap đah păng.

¹³ Ƀiălah nơm nây yơh jêng nơm tâm ban ma gâp, Băl kan ndrel ma gâp, mĭt jiăng gâp.

¹⁴ Jêng phung tă nkoch bri ndrel rŏng ngăn ma gâp, Jêh ri hên hăn ndrel jêh ma phung âk tât ngih Brah Ndu.

¹⁵ Ŭch ma nau khĭt tât ma khân păng gơnh ro! Ŭch ma khân păng hôm gŭ rêh mra tŭp tâm ƀon phung khĭt! Yorlah nau mhĭk gŭ tâm ngih khân păng jêh ri tâm nuih n'hâm khân păng.

¹⁶ Ƀiălah gâp mra kuăl mbơh sơm dăn ma Brah Ndu, Jêh ri Brah Yêhôva mra rklaih gâp.

¹⁷ Mhaơ, kêng ôi jêh ri nar nklang bôk, Gâp mra nter vơh, rđêng nđor, Nanê̆ Păng mra tăng bâr gâp.

¹⁸ Păng tâm rklaih nau rêh gâp tâm đăp mpăn tă bơh nau tâm lơh. Nđâp tơlah phung tâm lơh đah gâp âk ngăn.

¹⁹ Brah Ndu jêng Nơm chiă uănh bơh kăl e ƀaƀơ n'ho ro, Mra iăt jêh ri mplơ̆ sĭt ma khân păng. (Sêla) Yorlah khân păng mâu ŭch tâm rgâl ôh trong khân păng Mâu lĕ klach yơk ma Brah Ndu.

²⁰ Phung mhĭk yơr ti tâm rdâng đah phung bunuyh gŭ đăp mpăn ndrel ma păng; Ƀư tih đah nau khân păng tâm rnglăp jêh.

²¹ Bâr mbung păng mbĭr tâm ban ma dak ngi Ƀiălah tâm nuih n'hâm nchră mĭn nau tâm lơh. Nau ngơi păng ueh lơn ma ngi Ƀiălah jêng đao tŏk rơm lơi jêh.

²² Jao hom nau may anh jâk ma Brah Yêhôva, Păng mra kơl rdâng may; Păng mâu mra ăn phung sŏng srăng geh nau mpât n'gơ.

²³ Ơ Brah Ndu, phung ji hir mham jêh ri mƀruh ndơm Mâu mra dơi gŭ rêh n'gul mrô nar hŏ nal jêh ma păng, Kôranh Brah mra nklơ̆ khân păng Jŭr tâm ntu roh rai; Ƀiălah gâp ăt hôm rnơm nsing ma Păng.