Nau Mprơ Ơm 54 - Nau Brah Ndu Ngơi 2023

Mbơh sơm dăn Kôranh Brah kơl gay tâm rdâng đah phung rlăng

Nau mprơ nti Y-Đavit, ƀư nchih ma nơm gai mprơ. Dŏng gong rêng rse. Tơlah phung Sip văch ngơi đah Y-Sôl pô aơ: “Mâu di hĕ Y-Đavit dôl gŭ krap ta nklang hên?”

¹ Ơ Brah Ndu! Dăn tâm rklaih gâp ma amoh May, Ma nau brah May phat dôih nau di ăn ma gâp.

² Ơ Brah Ndu, dăn iăt nau gâp mbơh sơm, Rkêng tôr iăt lĕ nau ngơi trôm mbung gâp.

³ Yorlah phung bu năch luh hao rdâng đah gâp, Bunuyh janh ƀai joi ƀư rai nau rêh gâp. Khân păng mâu ăn Brah Ndu gŭ tanăp măt khân păng. (Sêla)

⁴ Aơ, Brah Ndu kơl gâp, May jêng Nơm kuăn rdâng huêng gâp.

⁵ Păng mra mplơ̆ ma phung rlăng đah gâp ma nau tih mhĭk khân păng; Dăn May ƀư rai hom khân păng tĭng nau răp jăp May.

⁶ Ơ Brah Yêhôva, gâp mra nhhơr ma May ndơ ƀư brah sân săk; Gâp mra tâm rnê lah ueh ma amoh May Yorlah nau nây jêng nau ueh.

⁷ Yorlah May tâm rklaih gâp bơh lĕ rngôch nau rêh ni; Măt gâp saơ bu har plơng bôk phung rlăng đah gâp.