Nau Mprơ Ơm 53 - Nau Brah Ndu Ngơi 2023

Nau rluk jêh ri nau djơh mhĭk phung bunuyh

Nau mprơ nti Y-Đavit. Ƀư nchih ma nơm gai mprơ, tĭng bâr “Mahalat”

¹ Bunuyh rluk lah tâm nuih n'hâm pô aơ: “Mâu geh Brah Ndu ôh.” Khân păng rai yot da dê, ƀư lĕ kan ƀơ̆ ƀơch, Mâu geh du huê ƀư nau ueh ôh.

² Bơh ntŭk prêh klơ Brah Ndu uănh kon bunuyh, Gay ma rlong uănh bu nâm geh nau blau mĭn Tĭng joi Brah Ndu lĕ.

³ Lĕ rngôch bunuyh rŭch plơ̆ tă bơh nau rêh da dê, plơ̆ ndrel jêng djơh mhĭk. Mâu geh du huê bunuyh ƀư nau ueh ôh, Nđâp tơlah du huê mâu geh lĕ.

⁴ Di lĕ phung djơh mhĭk mâu gĭt rbăng? Khân păng sa rvăn phung ƀon lan Gâp tâm ban ma sa ƀănh Jêh ri mâu lĕ vah vơl dăn ma Brah Ndu.

⁵ Ntŭk mâu geh nau klach krit, Ƀiălah khân păng klach krit hâu ngăn. Yorlah Brah Ndu srih nting phung hăn tâm lơh đah phung ƀon lan Păng; Jêh ri khân păng mra geh nau bêk prêng, yorlah Brah Ndu chalơi khân păng.

⁶ Ơ! ŭch ngăn ma nau tâm rklaih phung Israel, văch tă bơh Siôn! Tơlah Brah Ndu djôt leo phung ƀon lan Păng plơ̆ sĭt tă bơh n'gor ƀư bu nă. Yakôb mra răm rhơn jêh ri phung Israel hâk maak.