Nau Mprơ Ơm 52 - Nau Brah Ndu Ngơi 2023

Phung ndơm mƀruh Kôranh Brah mra phat dôih

Nau mprơ nti Y-Đavit. Ƀư nchih ma nơm gai mprơ. Tơlah Y-Dôek, phung Êđôm, mbơh ma Y-Sôl gĭt pô aơ “Y-Đavit lăp jêh tâm ngih Y-Ahimalek”

¹ Hơi bunuyh janh ktang, mâm ƀư may ntưih êng ma nau janh? Nau ueh Brah Ndu hôm mro mrăng.

² May nchră ŭch ma nau ƀư rai. Mpiăt may tâm ban ma pêh poih hơr, Mbơh huy lĕ nau ndơm bu.

³ May rŏng nau mhĭk âk lơn ma nau ueh, Rŏng ngơi nau mƀruh rlau lơn ma nau sŏng srăng. (Sêla)

⁴ Ơ mpiăt mƀruh, May rŏng ngơi lĕ nau mhĭk.

⁵ Brah Ndu mra ƀư rai may n'ho ro. Păng mra nhŭp may jêh ri klŭp may ngai bơh ngih bok may; Păng mra rôk may bơh neh may gŭ rêh. (Sêla)

⁶ Phung sŏng srăng mra saơ jêh ri klach Bu gơm ma păng jêh ri lah:

⁷ “Nây jêng nơm mâu rnơm Brah Ndu Ƀư ntŭk mbe krap ma păng Ƀiălah rnơm nsing ma nau ndrŏng kuăng rmeh ler, Jêh ri ƀư ma păng nâp ma nau djơh mhĭk!”

⁸ Ƀiălah tâm ban ma tơm ôlive ndrêh ueh Tâm ngih Brah Ndu. Gâp rnơm nsing tâm nuih n'hâm ueh Brah Ndu Tât n'ho ro mâu blau lôch ôh.

⁹ Gâp mra tâm rnê lah ueh ma May ƀaƀơ Ma lĕ nau May ƀư jêh. Gâp mra mbơh amoh May tanăp phung răp jăp ma May Yorlah nau nây ueh lăng ngăn.