Nau Mprơ Ơm 50 - Nau Brah Ndu Ngơi 2023

Brah Ndu jêng Nơm phat dôih bunuyh sŏng srăng jêh ri phung djơh mhĭk

Nau Mprơ Ơm Y-Asap

¹ Nơm geh nau brah jêng Brah Ndu, jêng Brah Yêhôva, Lah jêh ri kuăl lĕ rngôch bunuyh Ntơm bơh mpeh nar luh kŏ tât mpeh nar nhâp.

² Bơh Siôn ueh reh rah vah ngăn, Brah Ndu nchrat ang jêh.

³ Brah Ndu he văch tât jêh ri mâu gŭ rklăk ôh. Tanăp Păng jêng ŭnh hit, Văr jŭm Păng jêng geh phŭt sial chuănh hâu ngăn.

⁴ Păng kuăl lĕ ndâr trôk prêh ta klơ Jêh ri neh ntu gŭ tâm dâng gay phat dôih phung ƀon lan Păng:

⁵ “Tâm rgum hom phung răp jăp văch ndrel ma Gâp, Jêng phung hŏ ƀư jêh nau tâm rnglăp đah Gâp ma nau mpa ƀư brah.”

⁶ Lĕ ndâr trôk mra mbơh nau sŏng srăng Păng. Yorlah Brah Ndu yơh jêng kôranh phat dôih. (Sêla)

⁷ “Hơi phung ƀon lan Gâp, iăt hom! Gâp mra lah, Hơi Israel, Gâp mra mbơh nau tâm rdâng đah may; Gâp jêng Brah Ndu, nây jêng Brah Ndu may.

⁸ Gâp mâu nduyh may ôh yor lĕ mpa ƀư brah Mâu lĕ nduyh may yor ndơ ƀư brah gŭch gŭ tanăp Gâp mro.

⁹ Gâp mâu mra nhŭp lĕ ndrôk nkuăng ntŭk ngih may Mâu lĕ sŏk be nkuăng tâm ndrung biăp may,

¹⁰ Yorlah lĕ rngôch mpô mpa tâm bri jêng ndơ Gâp da dê, Lĕ ntil mpô mpa gŭ tâm âk rbăn yôk tâm ban lĕ.

¹¹ Gâp gĭt lĕ ntil sĭm ta klơ yôk, Jêh ri lĕ mpô mpa bri jêng ndơ Gâp da dê.

¹² Tơlah Gâp ji ngot, Gâp mâu mra mbơh nau nây ma may gĭt ôh, Yorlah neh ntu jêh ri lĕ ntil mpô mpa tâm neh ntu jêng ndơ Gâp da dê.

¹³ Gâp mra sa puăch ndrôk nkuăng Mâu lah nhêt mham be nkuăng lĕ?

¹⁴ Nhhơr hom nau tâm rnê lah ueh jêng ndơ ƀư brah ma Brah Ndu Jêh ri ƀư lôch nau may ton ma Nơm Dŭt Prêh.

¹⁵ Kuăl mbơh sơm hom ma Gâp tâm nar rêh ni, Gâp mra tâm rklaih may jêh ri may mra tâm rnê ma Gâp.”

¹⁶ Ƀiălah Brah Ndu lah ma phung mhĭk pô aơ: “Mâm ƀư may nkoch tay lĕ nau vay dăp Gâp? Moh yor bâr mbung may ngơi ma nau Gâp tâm rnglăp?

¹⁷ Yor may tâm rmot nau nkra nti, Mƀăr lơi pakơi lĕ nau Gâp lah.

¹⁸ Tơlah may saơ nơm ntŭng may tâm di du ai nuih đah păng, May tâm pă ndơ đah phung văng tĭr.

¹⁹ Bâr mbung may ngơi lĕ nau mhĭk, Mpiăt may ngơi ma lĕ nau mƀruh nchơt.

²⁰ May gŭ ngơi kek ma phung oh nâu may, May ngơi nchơt ma kon bu klâu me may.

²¹ Nây jêng nau may hŏ ƀư jêh, bi Gâp gŭ rklăk; May mĭn pô aơ Gâp ăt tâm ban ma may. Ƀiălah Gâp mra nduyh rmal may, Mpơl lĕ nau nây tanăp măt may.

²² Hơi phung chuêl Brah Ndu, sek uănh hom! Tơlah mâu, Gâp hêk hăch may jêh ri mâu geh nơm dơi rklaih.

²³ Mbu nơm nhhơr nau tâm rnê lah ueh, ndơ ƀư brah jêng mât ton ma Gâp, Bi ma mbu nơm hăn tĭng trong nau sŏng, Gâp mra ăn saơ nau Brah Ndu tâm rklaih.”