Nau Mprơ Ơm 5 - Nau Brah Ndu Ngơi 2023

Dăn Kôranh Brah mât uănh gây klaih bơh phung mhĭk

Nau Mprơ Ơm Y-Đavit, ƀư nchih ăn ma Nơm gai mprơ dŏng ndrel rlet

¹ Ơ Brah Yêhôva, dăn rkêng tôr iăt nau gâp ngơi, Sek uănh nau lŭng nter gâp.

² Ơ Hađăch gâp, Brah Ndu gâp, Dăn iăt bâr gâp nter kuăl, Yorlah gâp mbơh sơm ma Kôranh Brah.

³ Brah Yêhôva ơi! Ơm ôi May tăng bâr gâp; Ơm ôi gâp nhhơr nau kuăl mbơh sơm jêh ri gŭ kâp.

⁴ Yorlah Kôranh Brah mâu di Brah Ndu rŏng ma nau ƀai ôh; Bunuyh mhĭk mâu dơi gŭ ndrel ma May ôh.

⁵ Bunuyh sưr rlau mâu dơi dâk ôh tanăp măt May; Kôranh Brah tâm rmot ma lĕ rngôch phung ƀư nau mhĭk.

⁶ Kôranh Brah ƀư rai lơi phung ngơi mƀruh; Brah Yêhôva uănh ji ngăn phung ji hir mham jêh ri phung ƀư nau ndơm.

⁷ Bi ma gâp, yor nau ueh Kôranh Brah âk ngăn, Gâp mra lăp tâm ngih Kôranh Brah, Gâp mra sŏk nau klach yơk Ma nau yơk mbah tanăp ngih brah kloh ueh May.

⁸ Ơ Brah Yêhôva, ma yor phung rlăng gâp, Dăn njŭn leo gâp tâm trong sŏng srăng May, Jêh ri ƀư lâng trong Kôranh Brah tanăp măt gâp.

⁹ Yorlah trôm mbung khân păng mâu nanê̆, Nuih n'hâm khân păng bêng ma nau ƀư rai, Ko khân păng nâm bu môch pơk lơi, Mpiăt khân păng ngơi ma nau nklă.

¹⁰ Ơ Brah Ndu, dăn rmal lơi khân păng! Ƀư rai lơi khân păng tâm nau khân păng tâm nchră; Dăn mprơh lơi khân păng yorlah bêng ma nau tih mhĭk, Yorlah khân păng hŏ ƀư jêh nau tâm rdâng đah May.

¹¹ Ăn ma lĕ rngôch phung rnơm nơm ma Kôranh Brah dơi gŭ maak, Troh bâr răm maak ƀaƀơ, Yorlah Kôranh Brah king n'gang lĕ bunuyh nây. Bunuyh rŏng ma amoh Kôranh Brah mra geh nau răm maak đŏng tâm May.

¹² Ơ Brah Yêhôva, yorlah May yơh mra ăn nau ueh uĭn ma phung sŏng srăng, Sŏk nau rŏng Kôranh Brah nkŭm nking bunuyh nây nâm bu khêl.