Nau Mprơ Ơm 49 - Nau Brah Ndu Ngơi 2023

Rnơm nsing ma drăp ndơ jêng rluk

Nau Mprơ Ơm kon sau Kôra, ƀư nchih ma nơm gai mprơ

¹ Hơi lĕ rngôch phung ƀon lan, iăt hom nau aơ; Hơi lĕ rngôch bunuyh gŭ tâm neh ntu, rkêng tôr iăt hom.

² Nđâp tơlah phung bu mâu yơk mâu lah phung bu yơk, Phung ndrŏng tâm ban ma phung o ach.

³ Bâr mbung gâp mra ngơi ma nau blau mĭn, Nau mĭn rvê bơh nuih n'hâm gâp jêng nau gĭt rbăng.

⁴ Gâp mra rkêng tôr iăt nau ngơi hôr; Gâp mra sŏk gong rêng gay rblang nau ngơi hôr.

⁵ Mâm ƀư gâp mra klach tâm nar mhĭk Tơlah nau djơh mhĭk phung ŭch ntrok ntŭk gâp nchueng nkŭm gâp?

⁶ Khân păng rnơm nsing ma drăp ndơ khân păng nơm, Ntưih êng nơm geh drăp ndơ âk rmeh.

⁷ Mâu geh ôh du huê nơm dơi tâm chuai oh nâu păng Mâu lah nkhôm rnoh chuai bunuyh nây tâm Brah Ndu.

⁸ Gay ma bunuyh nây geh nau rêh mro mrăng Mâu mra saơ nau rai lôch.

⁹ Yorlah rnoh tâm chuai nau rêh khlay rlau ir, Bunuyh nây mâu dơi nkhôm ôh.

¹⁰ Yor bu saơ nơm blau mĭn khĭt, Phung brŭt ndrăng jêh ri bunuyh rluk ăt khĭt tâm ban. Chalơi drăp ndơ păng ma bu êng.

¹¹ Khân păng mĭn tâm nuih n'hâm pô aơ ngih khân păng mra hôm mro mrăng Jêh ri ntŭk păng ăt hôm ƀaƀơ bơh rnôk aơ tât rnôk ri. Khân păng sŏk amoh khân păng nơm rnha amoh ma neh lŏ mir khân păng nơm.

¹² Ƀiălah kon bunuyh nđâp lah ndrŏng kuăng mâu mra hôm mro; Păng jêng tâm ban ma mpô mpa roh rai.

¹³ Trong khân păng jêng nau rluk khân păng; Jêh ri phung tĭng khân păng ŭch nau khân păng blau ngơi. (Sêla)

¹⁴ Khân păng jŭr tâm ƀon phung khĭt nâm bu phung biăp; Nau khĭt mra mât njrăng khân păng Ơm ôi, phung sŏng mra jot sôt khân păng. Săk jăn khân păng bu mra ƀư rai lơi. Ƀon phung khĭt jêng ntŭk khân păng gŭ.

¹⁵ Ƀiălah Brah Ndu mra tâm chuai huêng gâp bơh nau dơi ƀon phung khĭt Yorlah păng mra vơt rom gâp. (Sêla)

¹⁶ Lơi ta klach ôh tơlah du huê bunuyh plơ̆ jêng ndrŏng kuăng Tơlah nau chrêk rmah ngih nơm nây geh nau hao.

¹⁷ Yorlah tơlah bunuyh nây khĭt mâu lĕ dơi djôt du ntil ndơ, Nau chrêk rmah mâu dơi tĭng păng jŭr tâm trôm môch lĕ.

¹⁸ Nđâp tơlah dôl hôm gŭ rêh, bunuyh nây kơp êng păng nơm jêng geh nau ueh uĭn, Jêh ri dơi bu tâm rnê dôl păng ndrŏng.

¹⁹ Bunuyh nây mra văch ndrel ma noi deh phung chô yau păng: Mâu mra hôm dơi saơ nau ang đŏng ôh.

²⁰ Bunuyh geh nau ndrŏng kuăng jêh ri mâu geh nau gĭt rbăng Jêng tâm ban ma mpô mpa hăn tâm nau rai yot.