Nau Mprơ Ơm 48 - Nau Brah Ndu Ngơi 2023

Nau ueh jêh ri nau chrêk rmah Siôn

Nau mprơ. Nau Mprơ Ơm kon sau Kôra

¹ Brah Yêhôva dŭt toyh, khư ma lĕ nau mprơ tâm rnê Tâm ƀon Brah Ndu he Jêh ri ta klơ yôk kloh ueh Păng.

² Yôk Siôn prêh ngăn ueh reh Jêng nau răm maak ma lĕ rngôch neh ntu. Jêng yôk prêh lơn ma Saphôn, Jêng ƀon Hađăch dŭt toyh.

³ Brah Ndu gŭ lĕ pôih nâp tâm ƀon Jêh ri Păng jêng ntŭk păng nde krap.

⁴ Tơlah phung hađăch tâm rgum Jêh ri hăn lơh ƀon.

⁵ Khân păng saơ ƀon jêh ri hih rhâl, Krit klach jêh ri nchuăt du.

⁶ Nau râm sâr văch tât nchueng khân păng. Khân păng geh nau ji ngăn tâm ban ma bu ur dôl ji deh.

⁷ Kôranh dong nchah lơi khân păng Tâm ban ma sial mpeh luh nar dong nchah kumpăn Tarsis.

⁸ Nau phung hên hŏ tăng, Pôri saơ jêh tâm ƀon Brah Yêhôva ma phung tahan, Nây jêng tâm ƀon Brah Ndu hên: Brah Ndu ndâk njêng ƀon nây nâp n'ho ro. (Sêla)

⁹ Ơ Brah Ndu, tâm ngih brah May, Hên mĭn rvê ma nau ueh Kôranh Brah.

¹⁰ Ơ Kôranh Brah Ndu, mâm ƀư amoh May Jêh ri nau mprơ tâm rnê ma May ăn tât lĕ ntŭk dŭt rplay neh tâm ban pônây lĕ; Ti ma May bêng ma nau sŏng srăng.

¹¹ Ăn yôk Siôn maak răm, Phung kon bu ur Yuđa răm rhơn Yor nau May phat dôih.

¹² Hăn hom jŭm yôk Siôn, hăn nsong rvang jŭm ƀon, Kơp lĕ tŭm păng;

¹³ Uănh nanê̆ lĕ mpêr ƀon, Sek uănh lĕ ngih hađăch păng, Gay ma khân may nkoch tay rnôk kăndơ̆

¹⁴ Pô aơ: “Aơ Brah Ndu, Jêng Brah Ndu he kŏ tât n'ho ro dŭt ngăn; Păng mra njŭn leo he kŏ tât lôch du njăr rêh.”