Nau Mprơ Ơm 47 - Nau Brah Ndu Ngơi 2023

Brah Ndu jêng Hađăch Dŭt Prêh ta klơ lĕ rngôch rplay neh

Nau Mprơ Ơm phung kon sau Kôra. Ƀư nchih ma nơm gai mprơ

¹ Hơi lĕ rngôch ntil mpôl bunuyh, tap ti hom! Troh hom nau maak ma Brah Ndu.

² Yorlah Brah Yêhôva Dŭt Prêh jêng khư bu klach yơk, Păng jêng Hađăch dŭt toyh ta klơ neh ntu.

³ Păng ăn phung ƀon lan geh nau plơ̆ rŭch tanăp hên Păng ƀư lĕ bri dak mra gŭ tâm dâng jâng hên.

⁴ Păng săch drăp ndơn ăn ma hên. Jêng nau hâk răm Yakôb jêng nơm Păng rŏng. (Sêla)

⁵ Brah Ndu hao gŭ nklang bâr troh maak, Brah Yêhôva hao gŭ tâm bâr nŭng.

⁶ Mprơ tâm rnê hom ma Brah Ndu, ăn mprơ hom! Mprơ tâm rnê hom ma Hađăch hên, ăn mprơ hom!

⁷ Yorlah Brah Ndu jêng Hađăch ma lĕ rngôch neh ntu; Mprơ tâm rnê hom nau mprơ Păng.

⁸ Brah Ndu chiă uănh lĕ rngôch bri dak, Brah Ndu gŭ ta klơ sưng hađăch kloh ueh Păng.

⁹ Hađăch phung ƀon lan khân păng tâm rƀŭn ndrel Ƀư phung ƀon lan ma Brah Ndu Abraham Yorlah lĕ khêl neh ntu jêng ndơ Brah Ndu da dê; Păng geh nau yơk dŭt prêh.