Nau Mprơ Ơm 46 - Nau Brah Ndu Ngơi 2023

Brah Ndu jêng ntŭk mbe krap ma phung ƀon lan Păng

Nau mprơ phung kon sau Kôra, ƀư nchih ma nơm gai mprơ, tĭng bâr Alamôt

¹ Brah Ndu jêng ntŭk mbe krap jêh ri nau ktang hên, Păng kơl tâm lĕ nau rêh ni.

² Yor ri, hên mâu klach ôh, nđâp lah neh ntu geh nau rgâl, Yôk mpât n'gơ jêh ri bu klŭp tâm nklang dak mƀŭt.

³ Nđâp tơlah dak mƀŭt ngrông luh mpŭnh Jêh ri lĕ yôk mpât n'gơ yor nau n'goh neh. (Sêla)

⁴ Geh du n'hor dak krong, dak păng ƀư maak ma ƀon Brah Ndu, Jêng ntŭk kloh ueh, ntŭk gŭ Nơm Dŭt Prêh.

⁵ Brah Ndu gŭ ta nklang ƀon nây, păng mâu mra n'gơ ôh. Ơm ôi Brah Ndu mra kơl păng.

⁶ Phung mpôl băl bunuyh drơu drơu, lĕ bri dak n'gơ n'găr; Geh bâr Păng, neh ntu lêk hoch ro.

⁷ Brah Yêhôva ma phung tahan gŭ ndrel ma hên; Brah Ndu Yakôb jêng ntŭk hên nde krap. (Sêla)

⁸ Văch hom uănh lĕ nau kan Brah Yêhôva, Nau Păng ƀư rai ƀư jêh ta neh ntu.

⁹ Păng ăn lôch rklăk nau tâm lơh kŏ tât ta nglĕ dŭt rplay neh. Nkê̆ch pă lơi na, sreh lơi tak ăn âk gâl Jêh ri su lơi ma ŭnh lĕ ndeh seh.

¹⁰ Gŭ rklăk hom jêh ri ăn gĭt pô aơ Gâp jêng Brah Ndu; Gâp mra geh nau yơk tâm lĕ bri dak, Gâp mra geh nau yơk mbah tâm neh ntu.

¹¹ Brah Yêhôva ma phung tahan gŭ ndrel ma hên; Brah Ndu Yakôb jêng ntŭk hên nde krap. (Sêla)