Nau Mprơ Ơm 45 - Nau Brah Ndu Ngơi 2023

Nau mprơ maak rƀŭn tâm nsông hađăch

Nau mprơ nti phung kon sau Kôra. Tĭng nau mprơ rŏng “Sôsannim”, ƀư nchih ma nơm gai mprơ.

¹ Nuih n'hâm gâp bêng ler ma nau ueh ngăn; Gâp ngơi ma nau mprĭng aơ ma may; Mpiăt gâp tâm ban ma du mlâm mâng nchih du huê nơm nchih samƀŭt njêh.

² May ueh lơn ma lĕ rngôch phung bu klâu kon bunuyh; Mbung may bêng ler ma nau yô̆: Yor nây Brah Ndu ăn nau ueh uĭn ma may n'ho ro.

³ Hơi hađăch geh nau dơi, cheng hom đao ta bŭt; Tâm nau chrêk rmah jêh ri nau hit rnam may.

⁴ Yorlah nau ngăn, nau rdơ̆ rbăn jêh ri nau sŏng srăng, Ăn nsoh hom nau hit rnam may, ncho ndeh hăn tât ma nau dơi; Ti ma may ƀư lĕ kan khư nau bu yơk.

⁵ Lĕ hăr mplanh may Ntâp bluh ta play nuih phung rlăng may; Phung ƀon lan prah tâm dâng jâng may da dê.

⁶ Ơ Brah Ndu, sưng hađăch May hôm ƀaƀơ n'ho ro; Nau dơi ƀon bri hađăch May jêng nau dơi sŏng.

⁷ May rŏng nau sŏng srăng jêh ri tâm rmot nau djơh mhĭk. Yor nây Brah Ndu jêng Brah Ndu may Hŏ tŏ dak ngi nau maak ma may, jêh ri dơm may ta klơ phung hađăch êng,

⁸ Ao may n'hôl ƀâu kah, dak si tăng, alôê jêh ri sinamôn; Bơh tâm ngih hađăch ƀư ma la, nteh gong rêng ma rse ƀư maak nuih n'hâm may.

⁹ Tâm phung ndrŏng hađăch geh phung kon bu ur hađăch; Ur hađăch gŭ pa ma hađăch, ndơ nkrơ̆ ma mah Ôphir.

¹⁰ Ơ kon bu ur, iăt hom, mĭn rvê hom jêh ri rkêng hom tôr! Chuêl hom ƀon lan jêh ri ngih mbơ̆ ay,

¹¹ Jêh ri hađăch mra ŭch ma nau ueh ay. Yor păng jêng kôranh ay, yơk mbah hom ma păng.

¹² Kon bu ur ƀon Tyre mra văch djôt ndơ nhhơr Jêh ri phung ndrŏng lơn tâm ƀon lan mra văch dăn nau yô̆ ay.

¹³ Kon bu ur hađăch gŭ tâm ngih hađăch chrêk rmah ngăn; Ao păng tanh ma mah

¹⁴ Păng mra nsoh ao cheh hăn mpơl tanăp hađăch; Phung bu ur druh jêng băl păng hăn tĭng mra dơi njŭn tanăp hađăch.

¹⁵ Khân păng bu mra njŭn lăp tâm ngih hađăch Ma nau hâk maak, răm hâu ngăn.

¹⁶ Phung kon bu klâu hađăch mra ntrok ntŭk phung chô yau may; May mra njêng khân păng jêng kôranh chiă uănh tâm lam bri.

¹⁷ Gâp mra ăn amoh may dơi kah gĭt tâm lĕ rnôk; Yor nây, phung mpôl băl bunuyh mra tâm rnê lah ueh ma may ƀaƀơ n'ho ro.