Nau Mprơ Ơm 44 - Nau Brah Ndu Ngơi 2023

Dăn Kôranh Brah tâm rklaih bơh nau rêh ni

Nau mprơ nti phung kon sau Kôra. Ƀư nchih ma nơm gai mprơ

¹ Ơ Brah Ndu, trôm tôr hên tăng, Phung chô yau hên hŏ nkoch jêh Kan May ƀư jêh tâm rnôk khân păng Ntơm bơh kăl e.

² May sŏk ti May nơm mprơh du phung mpôl băl bunuyh, Ƀiălah ăn phung chô yau hên gŭ ta nây; May ăn ma phung mpôl băl bunuyh rai lêk, Ƀiălah ăn ma phung chô yau hên jêng ndrŏng.

³ Yorlah mâu yor ma đao khân păng dơi geh n'gor, Mâu lĕ yor ma ti khân păng dơi jêh, Ƀiălah yor ti ma May, Nting tur ti jêh ri ma nau ang muh măt May yơh, Yorlah May rŏng ma khân păng.

⁴ May yơh jêng Hađăch jêh ri Brah Ndu gâp. Dăn ăn nau ntrŭnh tâm rklaih ma Yakôb.

⁵ Yor May, hên mra ăn phung rlăng rŭch plơ̆; Ma amoh May, hên jot sôt phung rlăng.

⁶ Yorlah gâp mâu rnơm ma na ôh, Đao gưm gâp mâu lĕ mra tâm rklaih.

⁷ Ƀiălah May hŏ tâm rklaih jêh hên bơh phung rlăng, Ƀư ma phung tâm rmot ma hên geh nau bêk prêng.

⁸ Hên mprơ tâm rnê jêh ma Brah Ndu ăp nar, Jêh ri mra tâm rnê lah ueh ma Amoh May n'ho ro. (Sêla)

⁹ Ƀiălah aƀaơ May chalơi jêh hên, ƀư bêk prêng ma hên; May mâu lĕ hăn tâm lơh ndrel ma phung tahan hên đŏng ôh.

¹⁰ May ăn hên rŭch jêh tanăp phung rlăng Jêh ri phung tâm rmot ma hên ntŭng pit drăp ndơ.

¹¹ May ăn hên jêng tâm ban ma biăp bu djôt hăn ƀư puăch Jêh ri ăn hên nchah rai pru pra tâm lĕ bri dak.

¹² May tăch jêh phung ƀon lan May ma rnoh mâu khlay Uănh khân păng mâu khlay ôh.

¹³ May ƀư hên jêng ndơ ăn bêk ma phung chiau meng hên, Ƀư ndơ bu gơm mưch jêh ri jêng nơm khư bu mưch ma phung gŭ jŭm.

¹⁴ May ƀư ma hên jêng nau ngơi ta nklang lĕ bri dak, Tâm phung mpôl băl bunuyh mbu saơ hên ăt rteh bôk.

¹⁵ Ăp nar nau bêk prêng gŭ tanăp gâp, Nau bêk prêng nkŭm muh măt gâp.

¹⁶ Yorlah bâr ƀư mhĭk, rak rtăp, Nơm rlăng jêh ri nơm plơng bôk.

¹⁷ Lĕ nau nây geh tât ma phung kon Ƀiălah hên mâu chuêl May ôh. Mâu đŏng ƀư rai nau tâm rnglăp đah May.

¹⁸ Nuih n'hâm hên mâu plơ̆ rŭch ôh, Nhuat phung kon mâu nhhơt bơh trong May.

¹⁹ Nđâp lah pônây, May jot hăch jêh hên tâm ntŭk phung so bri, Nkŭm hên ma n'hâm nau khĭt.

²⁰ Tơlah hên chuêl Amoh Brah Ndu hên, Mâu lah hên yơr ti mpeh ma brah êng.

²¹ Brah Ndu mâu mra sek uănh ôh nau nây? Yorlah Păng gĭt ntŭk ndâp tâm nuih n'hâm.

²² N'hêl nanê̆, yor May yơh bu nkhĭt hên ăp nar, Bu uănh hên tâm ban ma biăp djôt hăn ƀư puăch.

²³ Ơ Kôranh Brah, kah rngăl hom! Mâm ƀư May bê̆ch? Ăn dâk hom, lơi ta chalơi ma hên mro mrăng ôh!

²⁴ Mâm ƀư May pôn măt May? Mâm ƀư may chuêl nau rêh ni jêh ri nau bu tŭn jot hên?

²⁵ Yorlah huêng hên tâp tâm dâng ndruyh neh, Săk jăn hên gŭ tep tâm dâng neh.

²⁶ Ăn May dâk hom gay ma sâm kơl hên; Tâm chuai hên yor nau nuih n'hâm ueh May.