Nau Mprơ Ơm 42 - Nau Brah Ndu Ngơi 2023

NDROM SAMɃŬT RƠH BAR ( Nau Mprơ Ơm 42 – 72 ) Nuih n'hâm ji hir ma Brah Ndu tâm nau rêh ni jêh ri jêng bu nă

Nau mprơ nti kon sau Kôra. Ƀư nchih ma nơm gai mprơ

¹ Ơ Brah Ndu! Huêng gâp ŭch mĭn ma May, Tâm ban ma du mlâm jun me ji hir n'hor dak.

² Huêng gâp ji hir ma Brah Ndu, Jêng Brah Ndu gŭ rêh mro mrăng. Ndah jŏ gâp mra văch Jêh ri dơi mâp tanăp Brah Ndu?

³ Ăp nar, bu ôp ma gâp: “Mbah ntŭk Brah Ndu may?” Pôri gâp rvăn dak măt ntrok ma ndơ sông sa Ăp măng nar.

⁴ Kăl e gâp hăn ndrel ma băl âk, Leo khân păng tât ta ngih Brah Ndu Geh bâr troh maak jêh ri mprơ tâm rnê, Ta nklang băl âk gŭ tâm rƀŭn. Aƀaơ kah gĭt lĕ nau nây Nuih n'hâm gâp rngot klâng, nuih n'hâm rngot ngăn ngên.

⁵ Ơ huêng gâp, mâm ƀư may rdja nuih n'hâm Jêh ri uh ah tâm săk jăn gâp? Kâp gân hom tâm Brah Ndu; Gâp mra mprơ tâm rnê ma Păng đŏng, Yorlah mâp măt Păng gâp dơi geh nau tâm rklaih.

⁶ Ơ Brah Ndu gâp! Huêng gâp rdja tâm nuih n'hâm gâp; Bơh bri neh Yurdan, bơh yôk Hermôn Jêh ri bơh dor Mitsar, Gâp kah gĭt tât ma May.

⁷ Brŏng jru tâm kuăl ndrăng păng Nteh drơu drơu nteh dak leng May; Lĕ rngôch rbuh jêh ri dak lêng May Nkŭm ta klơ gâp.

⁸ Tơlah pônây, dôl nar Brah Yêhôva ăn nau ueh bơh Păng; Dôl măng, nau mprơ Păng gŭ ndrel gâp, Nây jêng nau mbơh sơm ma Brah Ndu, jêng Nơm ăn nau rêh ma gâp.

⁹ Gâp lah ma Brah Ndu jêng Lŭ Toyh gâp pô aơ: “Mâm ƀư May chuêl gâp? Mâm ƀư gâp rngot klâng Tâm dâng nau tŭn jot phung rlăng?”

¹⁰ Dôl phung rlăng nsŭch ma gâp, Ăp nar khân păng ôp ƀaƀơ: “Mbah Brah Ndu may?” Ƀư ma gâp ji ngăn nâm bu pă nting.

¹¹ Ơ Huêng gâp, mâm ƀư may rdja nuih n'hâm Jêh ri uh ah tâm săk jăn gâp? Kâp gân hom tâm Brah Ndu; yorlah Gâp mra mprơ tâm rnê Păng, Jêng Nơm kơl gâp jêh ri Brah Ndu gâp.