Nau Mprơ Ơm 40 - Nau Brah Ndu Ngơi 2023

Dăn Kôranh Brah tâm rklaih bơh nau rêh ni

Nau Mprơ Ơm Y-Đavit, ƀư nchih ma nơm gai mprơ

¹ Gâp srôih kâp gân Brah Yêhôva, Păng rkêng tôr iăt bâr gâp kuăl dăn.

² Păng djôt gâp hao bơh ntu ƀư rai. Bơh nung bŏk rhuh. Păng dơm jâng gâp ta klơ lŭ toyh Jêh ri ƀư ăn nhuat gâp jêng nâp.

³ Păng dơm tâm trôm mbung gâp du nau mprơ mhe, Nây jêng nau mprơ tâm rnê ma Brah Ndu he. Âk bunuyh mra saơ nau nây jêh ri klach yơk Djôt nuih n'hâm rnơm nsing ma Brah Yêhôva.

⁴ Ueh maak yơh ma phung geh nuih n'hâm rnơm nsing ma Brah Yêhôva, Mâu rle nuih n'hâm ma phung sưr Mâu lah hăn tĭng ma phung mƀruh!

⁵ Ơ Brah Yêhôva Brah Ndu gâp, Nau kan khlay ngăn ngên jêh ri lĕ nau mĭn May ŭch ăn ma hên âk ngăn, Mâu geh nơm dơi rđĭl đah May; Tơlah gâp ŭch mbơh jêh ri nkoch tay lĕ kan nây, Geh âk ngăn, mâu dơi kơp ôh.

⁶ May mâu ŭch ôh ma mpa ƀư brah mâu lah ndơ ƀư brah rnih môi, May mâu dăn ôh ndơ ƀư brah gŭch mâu lah ndơ ƀư brah chuai nau tih, Ƀiălah May pơk jêh tôr gâp gay ma iăt nau May.

⁷ Aƀaơ gâp lah: “Aơ geh gâp. Tâm ndrom samƀŭt hŏ nchih jêh ma gâp.”

⁸ Ơ Kôranh Brah Ndu gâp, gâp maak ngăn ƀư tĭng nau mĭn May ŭch. Nau vay May gŭ tâm nuih n'hâm gâp.

⁹ Gâp hŏ mbơh jêh nau maak ma nau sŏng srăng May Ta nklang phung tâm rƀŭn âk ngăn, Nanê̆ ngăn, gâp mâu dơi prăp ôh trôm mbung; Ơ Brah Yêhôva, May gĭt nau nây.

¹⁰ Gâp mâu pôn ôh nau sŏng srăng May tâm nuih n'hâm gâp; Gâp mbơh jêh nau răp jăp jêh ri nau yô̆ ma nau May tâm rklaih; Gâp mâu pôn ôh nau ueh jêh ri nanê̆ May, Ma phung tâm rƀŭn âk.

¹¹ Ơ Brah Yêhôva! Lơi rhuăt ôh Nau yô̆ nđach May ma gâp; Ăn nau ueh jêh ri nau nanê̆ ngăn May Mât mray gâp ƀaƀơ.

¹² Yorlah geh âk ngăn nau mhĭk tât Hŏ nchueng jŭm gâp; Nau mhĭk gâp hŏ tĭng ban jêh gâp Kŏ tât gâp mâu nănh n'gơr măt ôh; Khân păng âk lơn sŏk ta klơ bôk gâp, Ăn nuih n'hâm gâp krit ngăn.

¹³ Ơ Brah Yêhôva! Ăn maak nuih n'hâm tâm rklaih gâp. Ơ Brah Yêhôva, dăn gơnh sâm kơl gâp.

¹⁴ Ăn ma phung joi ƀư rai nau rêh gâp Geh nau rŭng răng jêh ri bêk prêng; Ăn ma phung maak răm ma nau gâp roh rai Mra plơ̆ rŭch jêh ri bu tâm rmot.

¹⁵ Phung lah ma gâp: “Ah ha, ah ha!” Ăn khân păng geh nau rŭng răng yor geh nau bêk prêng.

¹⁶ Ăn lĕ rngôch phung joi May Geh nau răm maak jêh ri hâk răm tâm May; Ăn phung rŏng ma nau May tâm rklaih Lah mro pô aơ: “Brah Yêhôva dŭt toyh ngăn!”

¹⁷ Gâp aơ jêng bunuyh o ach jêh ri pưt kƀah; Ƀiălah May kah gĭt ma gâp ƀaƀơ. May jêng Nơm kơl jêh ri tâm rklaih gâp. Ơ Brah Ndu gâp, lơi gŭ kâp jŏ ôh!