Nau Mprơ Ơm 4 - Nau Brah Ndu Ngơi 2023

Nau mbơh sơm kêng mhaơ

Nau Mprơ Ơm Y-Đavit, ƀư nchih ăn ma nơm gai mprơ dŏng ndrel lĕ gong rêng rse

¹ Ơ Brah Ndu sŏng srăng gâp! tơlah gâp kuăl mbơh sơm, dăn plơ̆ lah ma gâp. Tơlah gâp geh nau rêh ni, dăn njŭn gâp luh ta ntŭk huy toyh; Dăn yô̆ nđach an ma gâp jêh ri iăt nau gâp mbơh sơm.

² Ơ kon bunuyh, nau khưm gâp ndah jŏ bu mra ƀư nau bêk prêng? Khân may rŏng nau dơm dam jêh ri ndah jŏ tĭng joi nau mƀruh? (Sêla)

³ Khân may mra gĭt Brah Yêhôva hŏ prăp êng jêh bunuyh blau yơk ma Păng. Tơlah gâp kuăl mbơh sơm, Brah Yêhôva mra iăt nau gâp.

⁴ Klach nsâr hom jêh ri lơi ta ƀư tih ôh; Dôl gŭ bê̆ch ta klơ sưng, mĭn rvê hom tâm nuih n'hâm jêh ri gŭ rklăk. (Sêla)

⁵ Nhhơr hom nau sŏng srăng ƀư jêng ndơ ƀư brah, Jêh ri rnơm nsing ma Brah Yêhôva.

⁶ Âk bunuyh lah: “Mbu nơm mra ăn ma hên saơ nau ueh maak?” Ơ Brah Yêhôva, dăn nau ang muh măt May sol ta hên!

⁷ May ăn nuih n'hâm gâp bêng ler nau maak, Rlau lơn ma nau maak khân păng tơlah geh ba ƀlê jêh ri rmeh âk ndrănh krăk ƀâu.

⁸ Ơ Brah Yêhôva, gâp mra lâng săk jêh ri gŭ bê̆ch ma nau đăp mpăn; Yorlah knŏng du huê May mât rong gâp dơi gŭ rêh ueh mpăn.