Nau Mprơ Ơm 39 - Nau Brah Ndu Ngơi 2023

Nau dơm dam tâm nau rêh

Nau Mprơ Ơm Y-Đavit, ƀư nchih ăn ma nơm gai mprơ Y-Jêduthun.

¹ Gâp lah pô aơ: “Gâp mra prăp lĕ trong gâp, Gay prăp mpiăt gâp mâu ƀư tih: Tơlah dôl phung mhĭk gŭ tanăp gâp, Gâp mra mêm lơi trôm mbung gâp.

² Gâp gŭ rklăk, mâu ngơi Kŏ tât nau ueh ăt mâu dơi luh bơh trôm mbung gâp; Bi ma nau rngot hao âk lơn đŏng.

³ Nuih n'hâm gâp nâm bu gŭch nâm bu su, Dôl gâp gŭ mĭn, ŭnh sa hit; Aƀaơ mpiăt gâp ngơi:

⁴ Ơ Brah Yêhôva, ăn gâp gĭt nau gâp nglĕ dŭt tâm nau rêh gâp Jêh ri mrô ăp nar gâp mâm jêng; Ăn gâp gĭt nau rêh gâp n'hơ ngăn!

⁵ Aơ May ăn nar khay gâp jong tâm ban ma mpang ti, Jêh ri nau rêh gâp jêng dơm dam tanăp May; Di yơh, ăp nơm bunuyh nđâp lah gŭ nâp knŏng tâm ban ma nsôr n'hâm. (Sêla)

⁶ N'hêl nanê̆ ăp nơm chuat hăn tâm ban ma gui. Ăp nơm ndil ndal dơm dam da dê; Bu bun drăp ndơ ƀiălah mâu gĭt mbu mra sŏk lơi.

⁷ Ơ Kôranh Brah, moh ndơ gâp kâp gân? Nau gâp kâp gân gŭ tâm May.

⁸ Dăn rklaih gâp bơh lĕ rngôch nau ƀư tih; Lơi ăn gâp jêng nau ƀơ̆ ƀơch ma phung rluk.

⁹ Gâp mlo mâu hă trôm mbung ôh, Yorlah May ƀư jêh nau nây.

¹⁰ Dăn sŏk lơi bơh gâp nau May tâm rmal: Gâp lĕ huăr yor nau ji nuih ti May.

¹¹ Tơlah May nduyh phung kon bunuyh yor djơh mhĭk, May ƀư roh lêk nau ueh păng nâm bu nchiăr bon: Nanê̆ nau rêh bunuyh jêng dơm dam! (Sêla)

¹² Ơ Brah Yêhôva! iăt hom nau gâp mbơh sơm, Rkêng tôr iăt nau gâp kuăl; Lơi gŭ rklăk tanăp dak măt gâp Yorlah gâp jêng bu năch tâm ngih May, Phung bu năch hăn nsong ƀât lât nâm bu lĕ chô yau gâp.

¹³ Ơ Kôranh Brah! Dăn yô̆ an ma gâp gay ma gâp geh tay nau ktang Êlor ma gâp hăn du jêh ri mâu hôm đŏng ôh!”