Nau Mprơ Ơm 38 - Nau Brah Ndu Ngơi 2023

Nau mbơh sơm rmal nau tih

Nau Mprơ Ơm Y-Đavit, ƀư nchih gay kah gĭt

¹ Hơi Brah Yêhôva! Lơi duh ji nuih gay ma nduyh gâp, Mâu lĕ duh nuih gay nduyh nkra gâp.

² Yorlah lĕ hăr May ntâp ta săk gâp Jêh ri ti May tŭn jâk ta klơ gâp.

³ Yor nau May ji nuih, Ntâu puăch gâp mâu geh ntŭk ueh ôh; Yor nau tih gâp, Nting nđăng gâp mâu hôm nŭm ơm.

⁴ Yorlah nau djơh mhĭk gâp bun dăp hao rlau bôk gâp; Khân păng tŭn gâp ta klơ gâp tâm ban ma du ntil anh jâk.

⁵ Yorlah gâp rluk, Lĕ sôt rmanh gâp ƀâu ôm jêh ri tŏh ok.

⁶ Gâp ji dŭt n'hâm ngăn, kuăt bŭt, kŭnh măt; Gâp chuat hăn ma nau rngot rvê ăp nar.

⁷ Yorlah ndŭr kơi gâp duh ngăn nâm bu ŭnh sa, Jêh ri puăch ntâu gâp mâu geh nau ntŭk ueh.

⁸ Gâp rgănh hươi jêh ri rgănh suan, Gâp nđêng yor nau rêh ni tâm nuih n'hâm.

⁹ Ơ Kôranh Brah! Lĕ rngôch nau gâp ŭch gŭ tanăp May da dê. Nau gâp nter mâu dơi pôn ma May ôh.

¹⁰ Nuih n'hâm gâp nsâr, nau ktang gâp huêt rhôi jêh; Măt gâp mâu hôm ang đŏng.

¹¹ Dôl gâp mâp nau mhĭk tât, lĕ noi deh, phung mĭt jiăng du ngai đah gâp, Phung mpôl băl ăt gŭ ngai ma gâp.

¹² Phung joi ŭch nkhĭt gâp, sân dăk ma gâp Lĕ phung ŭch ƀư mhĭk ma gâp ngơi nau ƀư rai ƀaƀơ, Jêh ri ŭch ndơm gâp ăp nar.

¹³ Ƀiălah gâp jêng tâm ban ma du huê tê̆k mâu tăng, Tâm ban ma du huê mlo mâu hă mbung.

¹⁴ Ngăn yơh, gâp jêng tâm ban ma du huê bunuyh mâu tăng, Mbung mâu gĭt nau tâm rlăch du ntil nau.

¹⁵ Yorlah ơ Brah Yêhôva! Ăn nuih n'hâm gâp kâp gân tâm May, Ơ Kôranh Brah jêng Brah Ndu gâp, May mra plơ̆ lah nau gâp.

¹⁶ Yorlah gâp lah: “Lơi ta ăn khân păng hâk răm yor gâp. Mâu lĕ ăn khân păng mbĭr măt tơlah jâng chêh prah.”

¹⁷ Gâp bơi ma prah sơmok, Nau rngot hôm e gŭ jŏ kêng gâp ƀaƀơ.

¹⁸ Gâp mbơh nau djơh mhĭk gâp, Gâp rngot yor nau tih gâp.

¹⁹ Ƀiălah phung rlăng gâp hôm gŭ rêh jêh ri ktang, Phung tâm rmot ma gâp mâu geh nau âk đŏng.

²⁰ Bi phung mplơ̆ nau mhĭk ntrok nau ueh gâp tâm rdâng đah gâp, Yorlah gâp ŭch hăn tĭng nau ueh.

²¹ Ơ Brah Yêhôva! Lơi ta chalơi gâp. Ơ Brah Ndu gâp! Lơi ta gŭ ngai đah gâp.

²² Ơ Kôranh Brah! May jêng nau tâm rklaih gâp, Dăn văch gơnh tâm rklaih gâp!